Leagan LEGO de Theach Solais Fhánada i gcomórtas deartha
Tá seans ann go mbeidh tú in ann mionsamhail oifigiúil LEGO de Theach Solais Fhánada, an teacht solais cáiliúil i bhfíorthuaisceart Ghaeltacht Thír Chonaill, a cheannach go luath.
Ar shuíomh oifigiúil an chomhlachta LEGO, tá áis ann do dhearthóirí a smaoineamh féin do sheit nua LEGO a chur faoi bhráid an phobail agus faoi bhráid an chomhlachta féin. Má éiríonn leis an smaoineamh 100 vóta a fháil sa gcéad dá mhí, gabhfaidh sé ar aghaidh chuig an gcéad chéim eile.
Tá an chéim sin bainte amach ag an mionsamhail de Theach Solais Fhánada a dhear duine faoin ainm úsáideora JBMakemson. Agus 232 vóta faighte aige go dtí seo, tá 209 lá fágtha ag JBMakemsom an méid vótaí agus is féidir leis a mhealladh dá dhearadh agus an seans a bhuachan dul faoi bhráid na moltóirí oifigiúla LEGO.
Tá an mionsamhail a dhear JBMakemson sách mór d’fhirín LEGO agus tá cuid de thírdhreach sceirdiúil Ghaeltacht Thír Chonaill curtha san áireamh aige ann freisin. Tá na dearadh thar a bheith cruinn agus d’aithneofaí go héasca an teach solais aitheanta, a tógadh breis agus 200 bliain ó shin le báid a bhí ag teacht i dtír ag Loch Súilí a chosaint. Tá dhá fhirín LEGO, bean agus fear, agus dhá dheilf san áireamh sa seit freisin.
Tá a dtacaíocht tugtha don togra ag lucht an tí solais féin agus iarrtha acu ar a leantóirí ar na meáin shóisialta vótaí a chaitheamh don mhionsamhail ar shuíomh LEGO Ideas. Ní dhéanfar cinneadh faoin togra go ceann tamaill eile, agus, mar a bheifí ag súil leis, tá na mílte iarratas eile istigh ó gach cearn den domhan ar shuíomh LEGO Ideas.
Áirítear Fánaid ar cheann de na trí áit is deise i nDún na nGall atá lonnaithe ar Shlí an Atlantaigh Fhiáin. Is iad an dá áit eile ar an liosta Cionn Mhálanna agus Sliabh Liag.
Tá Teach Solais Fhánada 39 méadar ar airde agus cé go rangaítear é i measc na dtithe ‘farraige’, caitheann sé solas ar Loch Súilí freisin. Tógadh an teach tar éis don fhrigéad Saldana dul go tóin poill ar Chionn Fhánada sa bhliain 1812. Dúirt an Captaen Hill, ó Chabhlach na Breataine, nach mbeadh an long ar an ngrinneall dá mbeadh teach solais ar ‘Fannet Point’.
Ceadaíodh an teach solais a thógáil sa bhliain 1814. Lasadh an solas den chéad uair ar Lá Fhéile Pádraig 1817. Chaitheadh sé solas seasta dearg amach ar an bhfarraige agus solas seasta bán ar an loch. Rinneadh athchóiriú ar an teach sa bhliain 1886. Cuireadh airde ar an túr agus cuireadh solas nua ag caochaíl ina bharr.
Más maith leatsa tacú leis an bhfeachtas ar shuíomh LEGO, níl le déanamh agat ach vóta a chaitheamh anseo!
Níos mó
NÓS | NÓS
