Tuar na haimsire tugtha ag Carol Vorderman sa Bhreatnais
Thug an láithreoir aitheanta teilifíse as an mBreatain Bheag, Carol Vorderman tuar an haimsire i dteanga dhúchais a tíre ar an stáisiún teilifíse Breatnaise S4C ag an deireadh seachtaine.
Beth sydd angen arnoch ar ddiwrnod gwlyb ym mis Ionawr? Carol Vorderman yn cyflwyno’r tywydd yn GYMRAEG, wrth gwrs!
— S4C 🏴 (@S4C) January 26, 2020
There’s nothing you need more right now than @carolvorders presenting the weather IN WELSH 🏴
#Iaith2020 @S4Ctywydd @owainwynevans @S4Cdysgucymraeg pic.twitter.com/RXtGbdhbX6
D’fhás Carol aníos sa bhaile Prestatyn agus ba chainteoirí dúchais Breatnaise a sinsir, cé nár tógadh leis an teanga í féin. Thug sí faoi ranganna Breatnaise den chéad uair cúpla mí ó shin mar chuid de shraith nua teilifíse a chraolfar ar S4C i mbliana, Iaith ar Daith.
Beidh cúigear atá go mór i mbéal an phobail ag glacadh páirte sa tsraith nua agus iad ag iarraidh an Bhreatnais a fhoghlaim. Beidh Carol ar an mbóthar lena comhghleacaí ón BBC, Owain Wyn Evansar feadh ceithre lá agus Owain ag iarraidh a theanga dhúchais a theagasc do bhean Countdown.
An dúshlán atá roimh Carol ná an turas ceithre lá timpeall a tíre dúchais a chríochnú gan ach an Bhreatnais a labhairt. Rinne sí staidéar ar an teanga ar scoil ach tá beagnach 45 bliain ann ó rinne sí scrúdú Breatnaise agus is beag deis a bhí aici ó shin a scileanna teanga a chleachtadh.
Beidh tascanna le déanamh ag na foghlaimeoirí ar an gclár nua agus bhí an tuairisc aimsire a craoladh ag an deireadh seachtaine ar cheann acu sin. Is láithreoir aimsire é Owain Wyn Evans agus chabhraigh sé go mór le Carol a stór focal agus a cur i láthair a fheabhsú don mhír a craoladh Dé Domhnaigh.
“Tá mé ag foghlaim na Breatnaise go páirt-aimseartha le dhá mhí nó mar sin, agus is breá liom é. Tá mé ag filleadh ar mo dhúchas. Foghlaimím rudaí go han-tapa, ach beidh tamall an sula mbeidh mé líofa, agus tá mé ag iarraidh a bheith líofa,” a dúirt sí.
Ar dhuine de na daoine eile a bheidh ag glacadh páirte i Iaith ar Daith beidh Ruth Jones a bhain cáil amach dá ról ar an gclár Gavin and Stacey.
