Tá sé deimhnithe ag Cumann Rugbaí na hÉireann tráthnóna go bhfuil na cluichí rugbaí idir Éirinn agus an Iodáil a bhí le n-imirt an mhí seo chugainn curtha ar athlá.
Bhí cluiche na bhfear i gCraobh na Sé Náisiún le bheith ar siúl i mBaile Átha Cliath ar an 7 Márta ach dúirt an tAire Sláinte Simon Harris aréir gur cheart an cluiche a chur siar mar gheall ar an gcoróinvíreas.
Chas ionadaithe ón IRFU leis an Aire Harris inniu chun an scéal a phlé agus beartaíodh an cluiche a chur siar, chomh maith leis na cluichí idir Éirinn agus an Iodáil a bhí le bheith ann an deireadh seachtaine céanna i gcraobh na mban agus sa chraobh faoi 20.
Dúirt Príomhfheidhmeannach an IRFU Philip Browne go raibh súil aige go mbeadh an IRFU in ann na cluichí a chur ar siúl uair éigin eile agus dúirt sé go mbeadh níos mó eolais faoin scéal acu faoi cheann cúpla lá.
Tá 12 duine básaithe leis an ngalar faoin tráth seo i dtuaisceart na hIodáile agus táthar tagtha ar bhreis is 370 cás den choróinvíreas sa cheantar sin.
Tástáladh nócha duine in Éirinn go dtí seo a raibh amhras ann go raibh an galar tolgtha acu ach níorbh amhlaidh a bhí i gcás aon duine acu.
Dúirt an tAire Sláinte Simon Harris inniu go mbeifí ag cur go mór le líon na ndaoine a ndéanfar tástáil orthu.
Rinneadh an socrú i dtaobh an chluiche mar chuid den athbhreithniú atá a dhéanamh ar ullmhúcháin na hÉireann don ghalar Covid-19 agus dlús á chur faoin obair réamhullmhúcháin.
Tá ráite ag an WHO, an Eagraíocht Dhomhanda Sláinte, go bhfuil níos mó cásanna nua den choróinvíreas anois lasmuigh den tSín ná mar atá cásanna nua sa tSín, an tír inar thosaigh an galar ag deireadh na bliana seo caite.
Dúirt Ard-Stiúrthóir an WHO, Dr Tedros Adhanom Ghebreyesus:
“Inné, den chéad uair, bhí líon na gcásanna nua a tuairiscíodh lasmuigh den tSín níos airde ná líon na gcásanna a tuairiscíodh laistigh den tSín.
“Is údar mór imní an fás tobann ar líon na gcásanna san Iodáil, i bPoblacht Ioslamach na hIaráine agus i bPoblacht na Cóiré. Tá cásanna dearbhaithe anois i mBairéin, san Iaráic, sa Chuáit agus in Óman, cásanna a bhfuil nasc acu leis an Iaráin. Tá cásanna eile san Ailgéir, san Ostair, sa Chróit, sa Ghearmáin, sa Spáinn agus san Eilvéis, cásanna a bhfuil ceangal acu leis an Iodáil.”
Sna figiúirí is deireanaí ón Lárionad Eorpach um Ghalair a Chosc agus a Rialú, maítear go bhfuil os cionn 80,000 cás den ghalar dearbhaithe agus os cionn
2,700 duine básaithe.
Dúirt an tAire Sláinte Simon Harris tráthnóna inné go raibh seans maith ann go dtiocfaí ar chás den ghalar anseo sna laethanta amach romhainn.
Fógraíodh níos túisce inniu go rabhthas tagtha ar an gcéad chás den víreas i Meiriceá Theas, sa Bhrasaíl.
