FÍSEÁN: Mná na hÉireann ag ceol ar son Women’s Aid
Tháinig ceoltóirí as gach cearn den tír le chéile le leagan speisialta den amhrán iomráiteach ‘Mná na hÉireann’ a chanadh ar son Women’s Aid.
Thaifead gach duine a phíosa féin den amhrán sa bhaile agus is é Seán Óg Graham a rinne meascán fuaime air agus Gráinne Holland a bhí i mbun eagarthóireachta.
“Bhí mé i gcónaí ag iarraidh leagan den amhrán sin a dhéanamh agus, leis an oiread ceoil ar na meáin shóisialta faoi láthair, spreagadh mé chun tabhairt faoi,” arsa Gráinne Holland.
“Tá mé thar a bheith sásta go bhfuil an oiread sin ceoltóirí iontacha páirteach ann. Bhí muid ag iarraidh rud éigin cruthaitheach dearfach a dhéanamh ar son cúis mhaith, agus sílim go bhfuil sin déanta againn.”
Tá na ceoltóirí ag iarraidh aird a tharraingt ar na mná sin uilig atá ag streachailt i láthair na huaire, mná atá ag fulaingt mar gheall ar an drochíde baile.
Agus na bearta dianghlasála i bhfeidhm mar gheall ar COVID-19, tá ardú ag teacht ar na staitisticí foréigin teaghlaigh.
Breis agus dhá thrian de na marthanóirí a d’fhreagair suirbhé Women’s Aid i mí Aibreáin 2020, dúirt siad leis an gcumann carthánachta go bhfuil an drochíde baile ag dul in olcas le linn na dianghlasála agus luaigh 72% díobh go bhfuil níos mó smachta ar a saol anois ag a mí-úsáideoir ó thosaigh tréimhse COVID-19.
Ráiteas ó na ceoltóirí uilig sa chomharghrúpa a chan ‘Mná na hÉireann’:
“Is amhrán dlúthpháirtíochta é seo do na mná agus do na páistí uilig atá ag fulaingt de bharr na drochíde baile, rud atá tar éis éirí níos measa le linn na mbeart imshrianta atá i bhfeidhm chun dul i ngleic le COVID-19.
Iarraimid oraibh tacú leis an obair ríthábhachtach a dhéanann Women’s Aid trí chabhrú linn airgead a bhailiú don chumann. Is féidir sin a dhéanamh ach brú ar an gcnaipe ‘Give Now‘.
Is é an bunchuspóir atá ag Women’s Aid sochaí a chothú nach nglacann le foréigean i gcoinne na mban. Bealach eile ar féidir leat cuidiú ná an leathanach seo a roinnt. Go raibh míle maith agat as do chuid flaithiúlachta. Is mór againn é.
Ár míle buíochas.”
