Tá pobal na Gaeilge i measc na ngrúpaí atá maslaithe cheana ag John Taylor, an ball de Theach na dTiarnaí i Sasana ar cuireadh ciníochas ina leith mar gheall ar ráiteas a rinne sé faoi Kamala Harris.
Tá géarcháineadh á dhéanamh ar an Bharún Kilclooney, John Taylor, iar-Aire Gnóthaí Baile i rialtas Stormont, ó thug sé ‘The Indian’ ar Kamala Harris, Leas-Uachtarán tofa na Stát Aontaithe.
Ag scríobh i mBéarla dó ar Twitter, chuir an tiarna UUP an cheist: “Cad é a tharlóidh má bhogann Biden ar aghaidh agus má dhéantar Uachtarán den Indiach? Cé a bheadh ina leasUachtarán ansin?”
Mhaígh Taylor nach raibh ainm Harris ar eolas aige nuair a scríobh sé an tvuít agus nach raibh aon chiníochas i gceist.
Tá cáineadh déanta ag ceannairí pháirtithe polaitíochta ó thuaidh, sa Bhreatain agus i SAM ar an tiarna saoil in Westminster.
Bhí alt ar an New York Times agus i nuachtáin eile i Meiriceá faoin scéal.
Ar ndóigh, dúirt John Taylor an rud céanna anuraidh faoi Leo Varadkar nuair a bhí sé ina Thaoiseach.
Thug Varadkar cuairt ar chontaetha an Dúin agus Ard Mhacha gan a inseacht don ionadaí áitiúil.
‘Typical Indian’ a scríobh Taylor an t-am sin.
Ach níorbh é sin an chéad uair gur mhaslaigh an t-iar-MP do Loch Cuan, iar-MLA agus iarfheisire Eorpach duine ar bhonn cine.
I 1988 mhaslaigh Taylor an t-iriseoir aitheanta agus cainteoir líofa Gaeilge Gearóid Ó Muilleoir a bhí ina leasuachtarán ar Aontas na Mac Léinn in Ollscoil na Ríona i mBéal Feirste ag an am.
Nuair a chuir Ó Muilleoir litir chuig Taylor maidir le deontais do mhic léinn, dúirt an feisire parlaiminte leis go rabhthas ag glacadh leis gur Éireannach bhí ann mar go raibh sloinne air nach bhféadfaí a fhuaimniú.
“Ó tharla gur ríléir é nach féidir d’ainm a fhuaimniú, tá sé déanta amach agam, bíodh mé ceart nó contráilte, gur Éireannach agus nach Briotanach tú.
“Molaim mar sin duitse, agus dóibh siúd a ndéanann tú ionadaíocht orthu, iarratas a dhéanamh ar aon deontas riachtanach ar rialtas Bhaile Átha Cliath.”
Dúirt Gearóid Ó Muilleoir é féin gur cuimhin leis go maith an litir a fháil.
Remember it well. Part of students’ union campaign asking our MPs to support the retention of grants. I think all the others backed us. Was shocked to get this reply and it made the front page of the Irish News.
— Gearóid Ó Muilleoir (@gerrymucker) November 9, 2020
