Bonn óir buaite ag Gael aitheanta i gComórtas Náisiúnta Lúthchleasa Mheiriceá
Tá bonn óir buaite ag an nGael aitheanta Kevin Scannell, a bhfuil cáil mhór air i saol na Gaeilge as an obair a dhéanann sé ar son na Gaeilge ar-líne, ag Comórtas Náisiúnta Lúthchleasa Stáit Aontaithe Mheiriceá.
Ghnóthaigh Kevin, atá ina ollamh leis an ríomheolaíocht in Ollscoil Saint Louis in Missouri, bonn óir don léim fhada i rannóg na Máistrí (daoine atá os cionn an leathchéid). Léim sé 5.71m – 20 ceintiméadar níos faide ná an fear a tháinig sa dara háit sa chomórtas uile-Mheiriceá, Fahim Muhammad.
Thosaigh Kevin, atá 51 bliain d’aois, ag glacadh páirte i gcomórtais léime fada thart ar dhá scór blianta ó shin – i bhfad sula raibh an Ghaeilge ar a thoil aige! Ghlacadh sé páirt i gcomórtais sóisearacha éagsúla agus é sna déaga, agus arís agus é ar an ollscoil agus ar feadh cúpla bliain ina dhiaidh sin. D’éirigh sé as i lár na 1990idí ach d’fhill ar an spórt agus é ceathracha bliain d’aois, ag leibhéal na máistrí.
“Bím ag traenáil go minic. Déanaim iarracht rud éigin a dhéanamh chuile lá – meáchan a thógáil nó tréimhse a chaitheamh ar an raon lúthchleasa suas an bóthar. An rud is tábhachtaí ag caoga bliain d’aois ná gortú a sheachtaint!
“Bhuaigh mé cúpla comórtas réigiúnach roimhe seo, ach seo é an chéad uair a ghlac mé páirt sa gcomórtas náisiúnta. Bhí áthas orm an chraobh a bhaint, ní raibh mé ag súil leis ar chor ar bith!” a dúirt Kevin le NÓS.
Dúirt sé nach dóigh leis go mbeidh sé ar fhoireann Mheiriceá i gCluichí Oilimpeacha na bliana 2024 in Paris na Fraince, ach go ndéanfaidh sé iarraidh an chraobh náisiúnta i Meiriceá a chosaint an bhliain seo chugainn.
Bhí Kevin ina chónaí i gCarna i nGaeltacht na Gaillimhe ar feadh tréimhse anuraidh agus bhí súil aige páirt a ghlacadh i gcomórtas náisiúnta na hÉireann, ach cuireadh gach comórtas ar ceal mar gheall ar an víreas corónach. Tá súil aige an deis sin a fháil arís amach anseo, mar sin féin.
