Tá grúpa mór liamhán gréine bailithe le chéile amach ó chósta Oileáin Árann.
Chonacthas suas le 14 liamhán gréine i dteannta a chéile sa bhfarraige idir cósta an Chláir agus Oileáin Árann le cúpla lá anuas.
Ba í tuairim lucht Thogra Liamháin Ghréine na hÉireann gur ag cúirtéireacht a bhí na liamháin ghréine amuigh ar an ród agus d’iarr siad ar aon duine a bheadh amuigh ag breathnú orthu ar a laghad 4 mhéadar a choinneáil idir iad féin agus na liamháin ghréine.
Is é an liamhán gréine an dara hiasc is mó ar domhan. Bíonn liamháin ghréine idir 7-9 méadar ar fhad ach d’fhéadfaidís a bheith suas le 11m ar fhad uaireanta.
Bíonn liamháin ghréine le feiceáil amach ó chósta na hÉireann idir mí Aibreáin agus mí Mheán Fómhair. Le roinnt blianta anuas bíonn liamháin ghréine le fieceáil go minic san uisce éadomhain amach ó oileán Acla.
Tá liamháin ghréine i mbaol a ndíothaithe de bharr go ndearnadh ró-iascaireacht ar an speiceas ar mhaithe leis an ola ina n-ae agus a gcuid eití.
