Ag taisteal sa Spáinn: Cuid de na háiteanna is áille sa tír!

Mar is eol dúinn go léir, is áit gleoite í an Spáinn. Ba cheart duit cuairt a thabhairt ar na háiteanna seo más féidir!

Barcelona

Is eol do chách gurbh í Barcelona ceann de na háiteanna is tarraingtí do thurasóirí timpeall an domhain.

Is áit dochreidte stairiúla í an chathair seo agus tá na mílte rudaí le déanamh ann. Is féidir cuairt a thabhairt ar an Sagrada Familia, Teach Gaudi, Músaem Picasso agus an Camp Nou, chun ach cúpla rud a luadh.

Más rud é go bhfuil fonn ort sos a thógáil, ná bí buartha, is féidir leat ceann de na céadta trá ann a roghnú agus do scíth a ligean.

Tar éis lá deas a bheith agat ag spaisteoireacht leat, is féidir leat bia agus cúpla deoch a fháil i gceann do na mílte bialainne iontacha atá ann sa chathair.

Ag deireadh an lae, bí cinnte luí na gréine a fheiceáil ó Mirador del Carmel, áit a bhfuil radharc iomlán agat ar an gcathair gleoite!

Granada

Is cathair stairiúil amach is amach í Granada.

Tá rianta an chultúir Mhoslamaigh le feiceáil thart timpeall na cathrach go léir, go háirithe sna foirgnimh agus sna caisleáin. An caisleán is cáiliúla ann is ea an Alhambra. Is deacair le creidiúint cé chomh hálainn is atá an caisleán seo agus is rud ríthábhachtach é cuairt a thabhairt ar an gcaisleán seo más rud é go bhfuil tú i nGranada.

Is cuma má théann tú go dtí Granada i rith an tsamhraidh nó sa gheimhreadh toisc go mbíonn an aimsir go maith ann ó thús deireadh na bliana. Níl na tránna i Malaga ach 40 nóiméad ón gcathair agus sa gheimhreadh, is féidir leat dul ag sciáil sna sléibhte Sierra Nevada, atá thart ar an fhad chéanna ó Granada.

Ó thaobh bia agus deoch de, tá clú agus cáil ar Granada mar gheall ar an tapas. Freisin, má cheannaíonn tú bia i nGranada, nó in Almeria, gheobhaidh tú greim bia saor in aisce freisin!

Alicante

Is cathair ilchultúrtha í Alicante le daoine ó gach aon áit ar domhan ina gcónaí ann.

Bíonn féilte iontacha in Alicante gach uile shamhraidh ina lasann siad tinte cnámh ar na tránna go léir, is aoibhinn an radharc é agus iad ar lasadh ar feadh an lae agus i rith na hoíche. Bíonn ceolchoirm ar siúl i rith an tsamhraidh agus bíonn daoine ag damhsa ar na sráideanna gach oíche. Tá atmaisféar dochreidte ann.

I rith an lae is féidir leat cuairt a thabhairt ar na tránna go léir. Is ea Playa San Juan an trá is cáiliúla, agus is ann a mbíonn an ghrian ag scoilteadh na gcloch gach lá!

Tá neart tithe tábhairne agus bialainne ar an gcósta, chomh maith le barranna karaoke ar an bpiara. Is cathair álainn é ar an iomlán agus ba cheart duit cuairt a thabhairt uirthi gan mhoill!