Tá bata agus bóthar tugtha ag Príomh-Aire na Breataine Liz Truss do Sheansailéir an Státchiste Kwasi Kwarteng agus gan ach sé seachtaine caite aige sa phost.
Tugadh bata agus bóthar do Kwarteng roinnt seachtainí i ndiaidh dá mhionBhuiséad na margaí agus cúrsaí eacnamaíochta a chur go mór trí chéile.
B’éigean cistí pinsin a tharrtháil agus tháinig ardú ar rátaí morgáiste i ndiaidh an bhuiséid inar fógraíodh ciorruithe cánach nach raibh maoiniú socraithe dóibh.
Fógraíodh go bhfuil Jeremy Hunt, a bhíodh ina Aire Sláinte agus Gnóthaí Eachtracha, ceaptha ina Sheansailéir, an ceathrú duine sa ról sin i mbliana. Chuir Hunt a ainm chun cinn don Phríomh-Aireacht ach cheal dóthain tacaíochta thacaigh sé le feachtas Rishi Sunak.
Táthar ag súil le fógra ó Liz Truss go bhfuil tuilleadh de na ciorruithe cánach a fógraíodh sa bhuiséad le cur ar ceal.
Dheimhnigh Kwarteng inniu go raibh bata agus bóthar faighte aige nuair a scaip sé ar Twitter an litir inar ghlac sé le cinneadh Truss.
“Tá iarrtha agat orm seasamh ar leataobh ó bheith mar Sheansailéir agat. Ghlac mé leis sin,” a dúirt sé.
Dúirt sé chomh maith gur chreid sé i gcónaí gurb í fís Truss an fhís cheart.
“Mar atá ráite agam go minic le roinnt seachtainí anuas, go bunúsach ní haon rogha é cloí leis an status quo. Rófhada atá an tír seo cráite ag rátaí fáis íseal agus cáin ard– is gá fós é sin a athrú chun go mbeadh rath ar an tír seo.”
Ag Kwarteng a bhí an dara tréimhse ba lú riamh mar Sheansailéir Státchiste na Breataine. Ag Iain Macleod a bhí an tréimhse ba lú sa phost sin. I 1970, fuair Macleod bás tobann de bharr taom croí agus gan ach 30 lá caite aige mar Sheansailéir.
