‘Go spreaga an Éigse seo an dream óg coisméigeanna Joe Steve a leanacht’
Dúirt Páid Ó Neachtain, mac an scríbhneora mhóir Joe Steve Uí Neachtain, go raibh súil aige go spreagfadh an éigse a reáchtáladh in ómós a athar an deireadh seachtaine seo caite an chéad ghlúin eile le tabhairt faoi na healaíona béil agus faoin litríocht.
Seoladh an chéad ‘Éigse Joe Steve’ oíche Dé hAoine i Seanscoil Sailearna in Indreabhán. Bhásaigh an scríbhneoir agus file mór le rá i mí Eanáir na bliana 2020, cúpla seachtain sular bhuail an chéad ráig den víreas corónach an tír i gceart. Rinneadh cúpla iarracht fear na Cré Duibhe a chomóradh i gcaitheamh an ama ó shin ach chuir na srianta in aghaidh an víris isteach ar na hiarrachtaí sin.
Tháinig pobal Chois Fharraige le chéile faoi dheireadh in ionaid éagsúla ar fud an cheantair i gcaitheamh an deireadh seachtaine leis an gceardaí focal a chomóradh agus a cheiliúradh.
Agus é ag labhairt ag seoladh na hÉigse sa tSeanscoil Dé hAoine, dúirt Páid Ó Neachtain go raibh súil aige go spreagfadh an Éigse an chéad ghlúin eile de scríbhneoirí, aisteoirí, agus gníomhaithe pobail i gCois Fharraige coisméigeanna a athar a leanacht. Bhí cáil mhór ar Joe Steve mar scríbhneoir próis, filíochta, agus drámaí, chomh maith le hagallaimh bheirte agus lúibíní. Dúirt Lochlainn Ó Tuairisg, eagarthóir de chuid Chló Iar-Chonnacht, oíche Dé hAoine nár casadh air riamh scríbhneoir a raibh máistreacht aige ar chuile réimse den litríocht mar a bhí ag Joe Steve.
Ghlac go leor de ghlúin óg an cheantair, garchlann Joe Steve féin ina measc, páirt sna himeachtaí comórtha a bhí ar siúl i gcaitheamh an deireadh seachtaine. Oíche Dé hAoine bhí ceol ann ó na hamhránaithe óga a chuir an togra ‘Fad Saoil’ le chéile in éineacht le Johnny Óg Connolly tamall de bhlianta ó shin agus d’inis gariníon Joe Steve, Saoirse, an scéal ‘An Táilliúir Glic’ dá raibh cruinnithe sa tSeanscoil.
Bhí Cumann Aisteoirí Chois Fharraige páirteach sa léiriú Seó Beo Joe a bhí ar siúl arú-aréir agus aréir, agus a bheidh ar siúl arís anocht sa tSeanscoil. Díoladh iomlán na dticéad do na trí sheó. Anuas ar an léiriú stáitse seo, bhí ‘preabléirithe’ ar bun i Siopa Uí Dhomhnaill ar an Spidéal, agus i Scéal Eile agus an Pota in Indreabhán. Tháinig aisteoirí óga agus aosta isteach gan rabhadh i lár na n-ionad seo agus rinne sceitsí, lúibíní, agus agallaimh bheirte do na custaiméirí.
Seoladh an leabhar deireanach ó pheann Joe Steve, Oiread Áiméan, ag an ócáid sa tSeanscoil oíche Dé hAoine freisin.
