‘Ceapaim go mbeidh La Rochelle róláidir do Laighin amárach’
Beidh La Rochelle ag tabhairt aghaidh ar Laighin i mBaile Átha Cliath ag an deireadh seachtaine agus beidh an Staid Aviva lán go béal le lucht leanúna an rugbaí. Tá deis ag Laighin Corn na Seaimpíní a chrochadh den chéad uair ó 2018 (nó den dara huair ó 2012) agus le Stuart Lancaster ag fágáil na foirne tar éis an chluiche, gan trácht a dhéanamh ar Johnny Sexton nach mbeidh ag caitheamh geansaí gorm Laighean arís, beidh lucht leanúna Laighean ag súil le bua le slán ceart a fhágáil leo.
Tá La Rochelle sa dara háit faoi láthair sa Top14 agus níl ach dhá phointe idir iad féin agus Toulouse atá ag barr na sraithe. Cé go bhfuil siad sa dara háit, tá an difríocht pointí is mó acu freisin. Tá cosaint an-mhaith acu, tá luas cosanta dochreidte acu, agus is maith leo brú a chur ar an leathchúlaí clibirte amuigh agus na cúlaithe ón síneadh amach. Ní raibh ach cúig shíneadh amach ag Laighin in aghaidh na Mumhan agus thaispeáin sé dúinn cé chomh tábhachtach is atá an síneadh amach dóibh, go háirithe nuair a chuimhnítear go raibh 25 acu in aghaidh Racing 92 níos túisce sa séasúr.
Tá fisiciúlacht ag La Rochelle freisin. Téann siad san iomaíocht sa ruc agus tá an chumhacht acu chun an lámh in uachtar a fháil murar stoptar iad. Tá siad sásta a bheith in adharca phaca an fhreasúra. Beidh jab ag paca Laighean iad a choinneáil faoi smacht.
Ach tá na himreoirí ag Laighin chun an cluiche seo a bhuachan freisin. Níor imir roinnt imreoirí in aghaidh na Mumhan ionas go bhfaighidís sos roimh an gcluiche. Níor imir leithéidí Porter, Sheehan, Furlong, Molony, Ryan, Doris, Gibson-Park, Ross Byrne, Ringrose, nó Keenan; deichniúr a bheidh ag imirt Dé Sathairn. Beidh siadsan ag teacht isteach sa chluiche lán le fuinneamh a bhuí le doimhneacht Laighean. Ach teastóidh an fuinneamh sin uathu.
Níor éirigh le Laighin in aghaidh na Mumhan. D’fhéadfá rá go raibh siad níos buartha faoin gcomórtas Eorpach ná an URC: i mo thuairim phearsanta féin, bhí an ceart acu. Bunaíonn Laighin a rath ar Chorn na Seaimpíní ach fós níor bhuaigh siad ach ceann amháin ó 2012. Le dhá bhliain anuas, bhuaigh siad formhór na gcluichí a d’imir siad gan mórán stró, ach chaill siad na cinn thábhachtacha: in aghaidh La Rochelle sa chraobh Eorpach anuraidh agus in aghaidh na Bulls agus na Mumhan sna babhtaí leathcheannais. An rud faoin spórt proifisiúnta ná, ag an leibhéal atá Laighin faoi láthair, comhaireann trófaithe agus trófaithe amháin. Agus nuair atá na himreoirí agat mar atá ag Laighin faoi láthair (imreoirí bonnchlocha na hÉireann don chuid is mó) tarlaíonn mionscrúdú.
Ceapaim go mbeidh La Rochelle róláidir do Laighin amárach. Ceapaim go gcuirfidh an stíl cosanta atá acu an iomarca brú ar Ross Byrne thar an 80 nóiméad agus go gcuirfidh an mhéid atá ag La Rochelle sa phaca isteach ar phleananna Laighean freisin. Ach is maith an scéalaí an aimsir agus má bhuann Laighin (agus tá an-seans acu fós) beidh an slán sin tuillte go maith ag Lancaster agus Sexton.
