Chuir ionadaithe ó RTÉ go láidir i gcoinne gnéithe den fhianaise a thug Ryan Tubridy agus a ghníomhaire, Noel Kelly, faoi chonspóid na n-íocaíochtaí in RTÉ.
Ag cruinniú den Choiste um Chuntais Phoiblí ar maidin, dúirt ardstiúrthóir nua RTÉ Kevin Bakhurst nár ghlac sé leis gur insíodh seacht mbréag faoi Tubridy, mar a mhaígh an láithreoir ag an gcoiste céanna an tseachtain seo.
Dúirt Kevin Bakhurst nach raibh sé ag iarraidh cinneadh ró-phras a dhéanamh faoina a bhfuil i ndán do Ryan Tubridy mar chraoltóir in RTÉ.
Dúirt sé go raibh bunús le cuid den cháineadh a rinne Tubridy agus Noel Kelly ar RTÉ, ach bhí na difríochtaí idir cuntas Tubridy agus léamh RTÉ ar chúrsaí go mór sa treis ag cruinniú an lae inniu.
Dúirt RTÉ ag an gcruinniú go ndeachaigh Noel Kelly, gníomhaire Ryan Tubridy, sa tóir ar na híocaíochtaí conspóideacha €75,000 in ainneoin go raibh a fhios aige go raibh an socrú le Renault imithe in éag.
Dúirt Ryan Tubridy agus Noel Kelly Dé Máirt nach raibh aon tuairim acu gur RTÉ seachas Renault a bhí ag déanamh na n-íocaíochtaí.
Shéan leas-ardstiúrthóir gníomhach RTÉ, Adrian Lynch, gurb ionann ríomhphost a seoladh ó RTÉ chuig Kelly i mí Feabhra 2020 agus gealltanas conartha go ndéanfadh RTÉ na híocaíochtaí ó Renault a fhrithghealladh.
Dúirt Lynch nach raibh socrú críochnúil ann faoi fhrithghealladh na n-íocaíochtaí go dtí mí na Bealtaine nuair a thug an t-iar-ardstiúrthóir, Dee Forbes, gealltanas ó bhéal do Kelly ar chruinniú Zoom.
Dúradh i ríomhphost Breda O’Keefe i mí Feabhra 2020 go raibh “dul chun cinn maith” déanta “faoin gcuma a bheadh ar an socrú tráchtála” agus go bhféadfaí “litir thánaisteach a chur ar fáil duit chun an táille a fhrithghealladh do thréimhse an chonartha”.
Dúirt Breda O’Keefe agus ionadaithe eile ó RTÉ roimhe seo gur cuireadh go láidir i gcoinne an phlean na táillí a fhrithghealladh.
Mhaígh Ryan Tubridy agus a ghníomhaire go raibh an gealltanas faoi fhrithghealladh na n-íocaíochtaí ar eolas ag gach duine ar bhord feidhmiúcháin RTÉ, rud a shéan Adrian Lynch.
“Bhí eolas in RTÉ faoin iarratas, ach ní raibh a fhios ag gach duine faoin ngealltanas,” a dúirt leas-ardstiúrthóir RTÉ.
Dúirt sé chomh maith nach socrú neamhspleách a bhí sa mhargadh le Renault ach cuid lárnach den idirbheartaíocht faoi chonradh Ryan Tubridy.
“Bhí an moladh go ndéanfaí na híocaíochtaí a fhrithghealladh lárnach sna cainteanna conartha idir RTÉ agus an tUasal Tubridy. Creidimid gach mbeadh an conradh substainteach sínithe gan an socrú breise, ná an frithghealladh.”
Dúirt Adrian Lynch agus Stiúrthóir Gnóthaí Dlí RTÉ Paula Mullolly go bhfaca siad ríomhphost Breda O’Keefe in 2020.
Dúirt Lynch nár tharraing sé aird ar an gcaint faoi na táillí a fhrithghealladh mar gur chuid de phróiseas leanúnach idirbheartaíochta a bhí ann seachas socrú críochnúil.
Dúirt ardstiúrthóir nua RTÉ Kevin Bakhurst go raibh conspóid na n-íocaíochtaí ar cheann de na heachtraí “ba náirí agus ba dhíobhálaí i stair na heagraíochta”.
Dúirt sé nár cheart do RTÉ a bheith ag socrú margaí tráchtála do chonraitheoirí agus go raibh na táillí á íoctar le conraitheoirí áirithe ró-ard.
“Cuireadh an dallamullóg ar an bpobal, mar a cuireadh oraibhse, ionadaithe poiblí. Níl sé sin inghlactha ar chor ar bith. Ba mhaith liom geallúint a thabhairt daoibh go bhfuil ceachtanna foghlamtha agus go bhfuil gníomh á dhéanamh.”
B’údar mór frustrachais i gcónaí na conspóidí éagsúla don phobal, do Bhord agus d’fhoireann RTÉ agus d’ionadaithe poiblí, a dúirt sé.
Dúirt Bakhurst gur cheart do RTÉ a bheith níos trédhearcaí ná mar a bhí agus gur chóir go mbeadh “caighdeán níos airde ó thaobh macántachta” ag baint leis na ráitis atá déanta go poiblí ag RTÉ. “.
“Tá rún daingean agam an t-athrú agus na leasuithe a chur i bhfeidhm a cabhróidh linn an tréimhse náireach seo a chur laistiar dínn agus muinín an phobail sa tseirbhís craoltóireachta phoiblí a fháil ar ais,” ar sé.
Dúirt Cathaoirleach RTÉ Siún Ní Raghallaigh go raibh Bakhurst ag tabhairt aghaidh ar na ceisteanna a bhí le freagairt ón am atá caite agus ar na teipeanna uafásacha a bhí tagtha chun solais.
