‘Síocháin san Úcráin’ – amhrán nua le Gabriel Rosenstock agus Enda Reilly
Tá amhrán nua ar son na síochána san Úcráin eisithe ag an scríbhneoir clúiteach Gabriel Rosenstock agus ag an gceoltóir Duibhlinneach Enda Reilly.
‘Síocháin san Úcráin’ is teideal don traic ina n-éilítear ar gach duine suí síos le chéile chun deireadh a chur leis an gcoimhlint seachas leanúint den chogaíocht mharfach.
Is é Gabriel a chum focail an amhráin agus Enda a chuir ceol leo ar an ngiotár.
“Tá dualgas ar scríbhneoirí agus ar chumadóirí amhrán an tsíocháin a chur chun cinn, comhchainteanna a mholadh, triail a bhaint as bealach na taidhleoireachta,” arsa Gabriel.
“Sa ré núicléach, níl aon bhealach eile ann mar d’fhéadfadh cogadh an cine daonna ar fad a chur i mbaol.”
Tá an tsíocháin ina gné lárnach de shaothar Gabriel le blianta fada agus chuaigh síochánaithe ar nós Joan Baez i bhfeidhm air agus é ag teacht in inmhe.
Is iomaí amhrán frithchogaíochta a d’aistrigh sé i gcaitheamh na mblianta agus tá leabhar tarraingteach faoi Mahatma Gandhi scríofa aige lena chois.
Is léir do Gabriel gur sa tóir ar scéalta cogaíochta a bhíonn na mórmheáin, rud a chuireann leis an márú agus leis an scrios.
“Scríobhas ‘Síocháin san Úcráin’ mar mheasas go raibh nuachtáin ar nós The Irish Times ag cur NATO chun cinn,” ar seisean.
“Ní nuacht í an tsíocháin, dar leo.”
Is i Stáit Aontaithe Mheiriceá atá Enda ag cur faoi le tamall agus dúirt sé go raibh sé fágtha sioctha ag drochscéala an chogaidh.
“Mar sin de nuair a sheol Gabriel na liricí chugam bhí saghas drogaill orm dul i ngleic leo ar dtús,” ar seisean.
“Ach, mar a tharlaíonn go minic, sula i bhfad bhí an giotár i mo lámha agam agus mé ag déanamh mo mharana ar na focail, féachaint cé na cordaí agus an fonn a chuirfinn leo.”
Ráiteas láidir ar son na síochána atá sa toradh ar an gcomhoibriú seo idir an bheirt, ráiteas ar cheart do gach duine atá bainteach leis an gcogaíocht, san Úcráin agus ar fud na cruinne, aird ghéar a thabhairt air.
