Podchraoladh Scéalta Thuatha Dé Danann le seoladh ar an ghrianstad
Seolfar sraith nua podchraoltaí Gaeilge bunaithe ar mhiotaseolaíocht na hÉireann ar ghrianstad an gheimhridh, an 22 Nollaig. Scéalta Thuatha Dé Danann is ainm don tsraith atá ina hathinsint ar scéal Dhiarmada agus Ghráinne. Scríofa, léite agus léirithe ag an cheoltóir iomráiteach Gráinne Holland, tabharfar léargas ar na scéalta seo trí shúile shochaí an lae inniu i gcúig mhír chumhachtacha.
Cothóidh ceol nua agus maisíochtaí fuaime atmaisféar cumhachtach draíochtúil sna míreanna seo ar cheann de mhórscéalta na hÉireann. Tabharfar éisteoirí ar shiúl ón ghnathshaol ar feadh seala agus ar thuras trí thírdhreach rúndiamhair le Diarmuid agus Gráinne féin.
Beidh éisteoirí in ann sult a bhaint as na scéalta seo pé áit is fearr leo a bheith ag éisteacht le podchraoltaí: sa charr, amuigh ag siúl, ar obair, ag cócaireacht, le cairde. Tá Gráinne Holland ag súil go mbeidh na podchraoltaí seo in ann lucht spéise as an nua a mhealladh i dtreo scéalta miotaseolaíochta, ábhar a bhfuil paisean aici féin dó.
“Tá dúil as cuimse agam sna scéalta seo agus bhí mé ag iarraidh tabhairt faoi thionscadal le fada a chuirfeadh fuinneamh as an nua i scéalta miotaseolaíochta agus a mheallfadh lucht éisteachta nua ina dtreo,” a dúirt Gráinne faoin tsraith nua.
Mhol sí cumhacht na sraithe agus a cumas éisteoirí nua a mhealladh:
“Baineann daoine taitneamh ar leith as podchraoltaí a thugann ar shiúl ó bhrú an tsaoil iad agus is cinnte go bhfuil an tsraith seo le háireamh ina measc. Idir an scéal, an ceol agus na maisíochtaí fuaime, tá fáilte roimh éisteoirí na maidí a ligean le sruth agus ligean don tsamhlaíocht dul leis an scéal. Tá mé cinnte go mbainfidh siad siúd a bhfuil spéis acu sa mhiosaseolaíocht, agus iad siúd nár chuala na scéalta seo roimhe, sult as na leaganacha seo.”
Corcra Media a léirigh an tsraith le maoiniú ó Fhoras na Gaeilge. Beidh ceol nuachumtha le Stephen Loughran agus Seosamh Campbell McArdle le cluinstin i rith na scéaltaí chomh maith le ceol ó albaim éagsula de chuid Ghráinne Holland. Stephen Loughran a rinne an taifead ar an tsraith ina stiuideó i mBéal Feirste agus Jack Warnock a rinne an meascadh. Beidh an tsraith ar fáil ar tuathdedanann.ie, suíomh nua idirlín atá le seoladh ar an ghrianstad fosta.
Cuirfear tús leis an tsraith ar an 22 Nollaig le mír nua gach coicís ar NÓS. Beidh an tsraith le cluinstin ar na hardáin phodchraoltaí go léir.
The post Podchraoladh Scéalta Thuatha Dé Danann le seoladh ar an ghrianstad appeared first on NÓS.
