Scannán mór Kneecap le seoladh ag Féile Sundance 2024
Béal Feirste, Páras, Brooklyn, Hollywood. Tá ag éirí thar cionn le Kneecap le sé bliana anuas in Éirinn agus i gcéin idir cheol agus chamchuairteanna san Eoraip agus Meiriceá Thuaidh. Is go Sundance 2024 atá siad anois, áit a mbeidh a scannán úr Kneecap, atá bunaithe ar a saol, ar an chéad scannán Gaeilge ar chlár na féile riamh.
D’eisigh an grúpa ceoil a chéad singil darb ainm ‘C.E.A.R.T.A’ in 2017 agus bhí sé ina chuid den chnuastéip rapcheoil 3CAG a lean é in 2018. Ó shin tá an triúr gríosaitheach, Móglaí Bap, Mo Chara, agus DJ Próvaí ag tarraingt aird orthu féin i Meiriceá agus ar an Mhór-Roinn. Mí i ndiaidh dóibh a bheith ina bpríomhaíonna ag Féile an Phobail i mí Lúnasa, d’fhógair na rapálaithe gur shínigh siad leis an lipéad ceoil Heavenly Recordings atá lonnaithe i Londain.
Chuir siad a gcéad singil ar an lipéad amach, ‘Better Way To Live’ ar an 15 Samhain. Tugann príomhamhránaí de chuid Fontaines D.C., Grian Chatten, tacaíocht ar an churfá le Móglaí Bap agus Mo Chara ag glacadh sealanna ar na véarsaí. Eisíodh físeán ceoil leis an singil, ar taifeadadh é i dTigh Mhadáin i lár Bhéal Feirste.
Anois tá siad ag seoladh a scannáin úir dar teideal Kneecap ag an fhéile scannán Sundance. Tá Sundance ar na féiltí scannán is mó le rá a léiríonn scannáin neamhspleácha agus a mheallann léirítheoirí agus dáileoirí scannán ó Hollywood agus níos faide i gcéin. Cuirtear an fhéile ar siúl gach mí Eanáir in Utah, SAM. Is ón fhéile seo a tháinig leithéidí Heathers (1989), Resevoir Dogs (1992), agus American Psycho (2000).
Tá an scannán bunaithe go fánach ar shaol an triúir, a chaith an chuid is mó de i ndiaidh Chomhaontú Aoine an Chéasta. Níl siad cleachtaithe le tormán na dTrioblóidí ach tá taithí leathan acu ar na hiarmhairtí meabhairshláinte i ndiaidh coimhlinte, nó sin mar a dhealraíonn sé agus iad ag labhairt faoin tráma idirghlúine chun oideas dochtúra a fháil sa chéad spléachadh ar an scannán.
Thig amharc ar an chéad spléachadh anseo.
Glacann Móglaí Bap, Mo Chara, agus DJ Próvaí róil dhrámata bunaithe orthu féin sa scannán grinn fhrithbhunaíochta. Beidh Michael Fassbender agus Simone Kirby ar an scáileán leo chomh maith. Is é an chéad scannán Gaeilge a léireofar riamh ag an fhéile agus araon leis sin, is é an chéad scannán nach scannán as SAM é a roghnaíodh don rannóg NEXT ann. Is rannóg í seo a raibh sé mar riail aici scannáin as SAM amháin a léiriú go dtí bhris Kneecap an ceann sin fosta. Díríonn an rannóg NEXT ar ‘scéalaíocht nuálach cheannródaíoch’.
Seolfar an scannán ag Sundance an 18 Eanáir 2024. Beidh Kneecap ag casadh amhrán i mBaile Átha Cliath ar an 12 agus an 15 Nollaig sula dtéann go Meiriceá don fhéile agus do chamchuairt eile a thosóidh i Márta 2024.
Coimhéad do ghlúine mar níl aon chuma ar an scéal go bhfuil na leaids réidh le stopadh.
The post Scannán mór Kneecap le seoladh ag Féile Sundance 2024 appeared first on NÓS.
