Is leor nod don aineolach – an bhfuil níos mó luacha ar an sacar ón bhaile?

‘Tá an diabhal gnóthach’ – bhuel, más é an cás é go dtugann tú tacaíocht do na diabhail féin (Manchain Aontaithe ar a bhfuil mé ag caint) san am i láthair, mo dhalta féin, caithfidh go bhfuil an diabhal sin an-ghnóthach agus go bhfuil ag éirí go hiontach leis. 

Tá mé ag tarraingt ar thríocha bliain d’aois anois agus tá an t-am sin de mo shaol bainte amach agam nuair a cheistím gach rud i mo shaol, maram. Ba é Manchain Aontaithe an chéad ghrá i mo shaol. Bhí Ole Gunnar Solskjaer sa bhomaite dheireanach ar cheann de na chéad chuimhní in 1999. Ag titim ó bharr an toilg a bhí mé nuair a scóráil sé cúl. An cúl a chríochnaigh an teacht ar ais ab fhearr dá raibh riamh i sacar (níos fearr ná Iostanbúl) le Corn na hEorpa a thabhairt chun an bhaile leis na diabhail dhearga an oíche chinniúnach sin in Barcelona. Cé nach raibh mé ach cúig bliana d’aois ag an am, mothaím an fíbín sin i mo chroí go fóill agus mé ag machnamh siar ar oíche agus ar am nuair a ba ghnách linn coirn a bhaint.  

Is caitheamh aimsire an-daor é an sacar a leanúint na laethantha seo, áfach, agus seans gur géarchéim na meánaoise luaithe is cúis leis an aithint sin. Tá tú ag caint ar £48 punt in aghaidh na míosa do Sky Sports amháin ag an bhomaite. Cuir ballraíocht TN Sports leis agus tá tú ag caint ar £720 punt ar a laghad in aghaidh na bliana gan labhairt ar Amazon Prime nó ar fhreastal ar chluiche le ticéid, eitiltí agus eile. 

£720 agus faigheann tú gach uile chluiche? Margadh den scoth, a deir tú. Ní mar a shíltear a bhítear, áfach, agus tá cosc curtha ag an Phríomhshraith ar aon chluiche ar an Satharn a thosaíonn ar a trí a chlog san iarnóin a bheith ar fáil ar an teilifís. Riail atá curtha i bhfeidhm ó na 60idí le freastal an chluiche a chaomhnú. 

Cuirim i gcás, ó thús an tséasúir i mbliana, tá 20 cluiche imeartha ag Manchain Aontaithe. Amach as an 20 cluiche sin, bhí 6 chluiche ann Dé Sathairn ar a 3. Mar sin de, thug mo bhallraíocht deis dom amharc ar 14 chluiche, go hoifigiúil. Ní bheadh bosca de na boscaí sin agamsa, dála an scéil, níl a fhios agam cé acu bosca nó ‘bata’ ar a bhfuil tú ag smaoineamh air! 

Costas ballraíochta ó Lúnasa go Nollaig 2023 – tuairim agus £350 le Sky Sports, TN Sports agus Prime san áireamh

Praghas in aghaidh an chluiche = £25

*Comhscór 0-0 in éadan Learpholl sa chluiche eile (d’íocfainn £100 gan amharc ar an chluiche sin arís, dála an scéil)

Fiú dá mbeadh agam an bata draíochta (agus níl agam le cur i gcuimhne arís eile), is é mo mheas nach bhfaighfeá luach do chuid airgid ag amharc ar na diabhail dhearga na laethanta seo. Tá costas thart faoi £140 ar na bataí sin in aghaidh na bliana. Díreach ar mhaithe leis an chothromas, ar mhaithe leis an fhianaise agus ar mhaithe le cara liom, seo chugaibh roinnt anailíse ar an chostas:

Costas draíochta – nach bhfuil fíor…(is leor nod don eolach…) – ballraíocht ó Lúnasa go Nollaig 2023 – £58.33

Praghas in aghaidh an chluiche = £2.92

*Comhscór 0-0 in éadan Learpholl sa chluiche eile.

Cá luíonn an t-aineolaí mar sin de, a deir tú? Bhuel, bhí mé féin i m’aineolaí ar an sacar sna sé chontae anseo go dtí le déanaí. 

Agus fadhbanna na meánaoise faoi bhláth i mo shaol, tá seacht gcluiche feicthe agam sa phríomhshraith sna sé chontae faoin am seo i mbliana agus tá mo chuntas X lán le scéalta ó fud fad na sraithe ó shin i leith. Tá mé gafa leis an tsraith anseo anois. Imríonn deartháir mo chailín le Glenavon ar an Lorgain agus mar sin de, is ansin a fhaighim mo chuid leighis. Cosúil le Manchain Aontaithe, thosaigh siad go trioblóideach ag tús na bliana ach neamhchosúil leis na diabhail dhearga, glacadh cinneadh leis an bhainisteoir a athrú ag deireadh mhí Mheán an Fhómhair. 

Stephen McDonnell, fear de bhunadh Dhún Dealgán atá mar bhainisteoir ar an fhoireann anois – an rud nó an duine is fearr a tháinig amach as Dún Dealgán ó Steve Staunton nó na sceallóga ón sceallóglann Roma! Sular tháinig sé isteach, chonacthas stíl imeartha cosúil le ‘ciceáil agus scipeáil’. Ocht gcluiche dhéag ina dhiaidh, tá rudaí ag dul i bhfeabhas. 

Dhá bhliain agus tríocha d’aois, shílfeá go mbeadh Pep Guardiola gan blagaid air ar an taobhlíne agus chonacthas stíl a mbeadh Pep é féin bródúil as. Cúlaí cliatháin aisiompaithe – níor chreid mé mo shúile – go háirithe nuair nár éirigh leis na diabhail dhearga a leithéid a dhéanamh go héifeachtach (féach Luke Shaw/Diogo Dalot/Sofyan Amrabat). Stiúradh Glenavon ó bhun na sraithe go lár na sraithe i lámha saoithe McDonnell. An bhfuil níos mó luacha le fáil agamsa, áfach?

Cead isteach do chluiche sa phríomhshraith sna 6 chontae – £13  

Praghas don 7 gcluiche – £91

*bhí cluiche amháin acu seo ann sular tháinig Pep Óg

Deirtear nárbh fhiú anailís a dhéanamh gan tátal a bhaint as. Is soiléir dom ón anailís go bhfeicim níos mó cúil sna cluichí Glenavon agus go mbaineann siad níos mó cluichí ar an mheán chomh maith. Is é an rud is mó atá foghlamtha agam, áfach, ná nárbh fhiú aon dlí a bhriseadh le tacaíocht a thabhairt do Mhanchain Aontaithe na laethanta seo agus nárbh fhiú a bheith ar an taobh cheart den dlí le bheith ag amharc orthu ach an oiread! 

‘Níl luibh ná leigheas ar an diabhal,’ a deirtear. Ach le fírinne, leigheas de chineál éigin ar an ghéarchéim atá ag titim amach le mo dhiabhail dhearga féin atá sa phríomhsraith anseo. Is leor nod don aineolach go dtiocfadh leat do leigheas féin a aimsiú níos cóngaraí don bhaile chomh maith. 

The post Is leor nod don aineolach – an bhfuil níos mó luacha ar an sacar ón bhaile? appeared first on NÓS.

Níos mó