Bhí an t-ádh ina rith ar SPRINTS ar a stop camchuairte i mBéal Feirste
★ ★ ★ ★ ★
Dé Sathairn, fuair muintir Bhéal Feirste a gcéad spléachadh ar an ghrian i mbliana agus cuireadh brí sa chathair dá bharr. Níorbh fhada go raibh na gairdíní beorach faoi lán seoil agus lucht caite raithní ag ceiliúradh 4/20 ins an Luibhghairdín. Mar bhuacphointe an tsonas earraigh seo, agus an ghrian ag dul faoi, b’iontach an taispeántas punc-gharáiste spleodrach a thug SPRINTS ins an Ulster Sports Club an oíche chéanna.
D’eisigh an ceathrar Baile Átha Cliathach an chéad fhadcheirnín dá gcuid Letter To Self ar an 5 Eanáir, agus díoladh gach ticéad dá gcamchuairt rathúil RA-Éireann i bhfad roimh ré. Ins an bhanna tá Karla Chubb (scríbhneoir, príomhamhránaí, giotáraí), Colm O’Reilly (príomhghiotáraí), Sam McCann (dordghiotáraí) agus Jack Callan (drumadóir). Is buanchairde ón scoil iad Chubb, O’Reilly agus McCann atá ag seinm le chéile ó bhí 10 mbliana slánaithe acu, an splanc iontach atá eatarthu le brath ina dteacht i láthair an-mhuiníneach ar an ardán.
Tá ardmholadh faighte ag an cheathrar ó léirmheastóirí móra an tionscail as a n-albam úr, le cúig réalta tuillte acu ó NME. Mar chuid lárnach den rabharta reatha de bhannaí giotáir Éireannacha a bhfuil an-tóir go deo orthu, is dócha nach iontas ar bith é go gcuirtear i gcomparáid iad go minic le leithéidí NewDad, Pillow Queens, The Murder Capital agus, dar ndóigh, Fontaines D.C..
Tá fuaim tharchéimnitheach cruthaithe acu, le rianta na luath-90idí ar nós Pixies agus Sonic Youth le mothú, iarracht de IDLES ins an liriciúlacht agus Otoboke Beaver le cluinstin ins an fhlosc agus an luas. Léiriú atá ins an lucht éisteachta ar an réimse tionchar seo le BBC 6 Dads, mar aon le mic léinn gléasta ó bhun go barr ins na héadaí is déanaí ó Depop, agus achan duine eatarthu le feiceáil ins an chúngach.
Ins an albam an-fhéinmhachnamhach seo, ar tugadh an t-ainm cuí Letter To Self air, nochtann Chubb mothúcháin, achrann agus tráma ón am atá caite agus ón am i láthair. Thug siad faoi ardán greamaitheach an Ulster Sports Club ag 8.45, ag cur tús leis an chéad amhrán ón albam ‘Ticking.’ Traic fíor-dhuairc atá ann a chothaíonn imní agus a thaibhríonn gach olc.
Á leanstan go díreach ina dhiaidh sin, sheinn siad ‘Heavy,’ traic a d’fhéadfá a rá atá chomh duairc agus chomh trom céanna ach rinne seinm giotáir sciobtha O’Reilly agus an teacht aniar a bhí le brath i nguth Chubb gur fheidhmigh sé mar leigheas agus catairsis ar an ísle brí.
Sheinn siad ‘I’m In A Band’ agus ‘Delia Smith’ óna gcéad EP chomh maith le dhá amhrán eile óna gceirnín úr, ‘Adore, Adore, Adore,’ agus ‘Cathedral,’ traic ina bpléann an príomhamhránaí a taithí mar bhean dhéghnéasach ag fás aníos san Eaglais Chaitliceach. Thug Chubb an slua léi, ag baint spóirt astu i modh grinn agus ag trácht ar an uair dheireanach a sheinn siad anseo in 2022.
D’ullmhaigh O’Reilly an slua le haghaidh athrú luais, ag ráit go raibh an chéad amhrán eile, ‘Shaking Their Hands,’ “níos fadálaí” óir ba shaghas bailéid é. Ní raibh aon ullmhú de dhíth ar an tslua nó tá an t-amhrán seo ar an amhrán is fearr agus is cumasaí ar an cheirnín. Thug Chubb focal buíochais do BBC Raidió Uladh as craoladh beo a dhéanamh ar an ghig sular ghabh sí a leithscéal le Gemma Bradley ón stáisiún, ‘Tá muid beo agus níl cead againn a bheith ag eascainí…och fuck that. Tá brón orm a Gemma!”
D’éirigh an slua an-tógtha ar fad nuair a phill Lara Minchin ón bhanna tacaíochta, Adore, ar an ardán agus rinne sise agus Chubb leagan spreagúil spleodrach de ‘Deceptacon’ le Le Tigre. Sular chuir SPRINTS clabhsúr trí amhrán ar an oíche, léirigh an príomhamhránaí gur grúpa prionsabálta radacach iad nach ndéanann dearmad ar a bhfréamhacha nó orthu siúd atá imeallaithe ag an domhan mhór faoi láthair.
“Thosaigh muid i mbothán gairdín beag. Seasann muid in éadán chinedhíothú na bPalaistíneach. Seasann muid le daoine de dhath. Seasann muid leis an phobal thrasinscneach.”
B’údar mór díomá agus déistine é an mhaidin dár gcionn nuair a bhí ar SPRINTS an ráiteas seo a leanas a chur amach ar na meáin shóisialta:
“Inné, rinneadh ionsaí gnéis ar Karla don dara huair ar an chamchuairt Letter To Self. Is uafásach an rud é gur tharla sé seo faoi dhó. Tá sé déistineach fós go dtarlaíonn a leithéid ar scor ar bith. Ní ghlacfaidh muid leis agus ní bheidh muid inár dtost faoi.
“Ba chóir go mbeadh bancheoltóirí in ann teagmháil a dhéanamh lena lucht éisteachta agus imeacht den stáitse gan eagla a bheith orthu roimh chrúbáil, cat-calling, agus ciapadh. Tá sé thar a bheith gránna go dtarlaíonn sé seo go laethúil do mhná go fóill.
“Ár mbuíochas leo siúd a thug faoi deara agus a thug dúshlán an duine. Dóibh siúd atá freagrach as an iompar, is mór an náire sibh.”
The post Bhí an t-ádh ina rith ar SPRINTS ar a stop camchuairte i mBéal Feirste appeared first on NÓS.
