Tiocfaidh an lá a bheidh náire ar Mheiriceá faoi scéal Kaepernick
Tá cúpla alt scríofa agam faoi chás an imreora peile Meiriceánaí, Colin Kaepernick, agus an drochbhail a cuireadh air mar gheall ar a sheasamh in aghaidh drochíde na bpóilíní in aghaidh daoine dubha.
Níor imir sé le trí bliana, ón uair go ndeachaigh sé síos ar a ghlúin agus amhrán náisiúnta na Stát Aontaithe á sheinm roimh chluichí. Ghlac sé leis an ‘seasamh’ seo, le haird a tharraingt ar líon na ndaoine dubha atá á gcaitheamh agus á marú ag póilíní i Meiriceá, go minic gan chúis ná fianaise.
Ó shin, tá an tslí bheatha a bhí aige caillte aige, tá sé tarraingthe óna chéile ag na milliúin, Uachtarán na Stát Aontaithe Donald Trump ina measc. Go tobann, le seachtain fógraíodh go mbeadh siad ag tabhairt deis do Kaepernick taispeántas a dhéanamh ós comhair cóitseálaithe éagsúla in iarracht áit a fháil dó ar fhoireann éigin.
Sin togha, ach ní mórán fógra a tugadh do Kaepernick ná do na foirne éagsúla. Mar sin, is beag seans go n-éireoidh leis aon áit a fháil, agus má éiríonn, ní haon fhoireann mór a bheidh ann, go háirithe agus é ag tarlú le linn an tséasúir imeartha agus foirne gnóthach cheana féin ag imirt cluichí.
Go deimhin, níl ach 11 foireann in ann glacadh le duine nua, as 32 foireann. Insíonn sé sin a scéal féin.
Theastódh a leithéid go géar ó na Dallas Cowboys, ach b’fhearr leis an úinéir atá acu déanamh gan é mar gheall ar a agóid.
Tá sé ráite ag Kaepernick go bhfuil sé aclaí agus go bhfuil trí bliana caite aige ag fanacht leis an deis seo. In 2017, thóg sé cás in aghaidh na sraithe peile, ag rá gur fágadh gan conradh é mar gheall ar chlaonpháirtíocht idir na húinéirí ar fad nár aontaigh leis.
Mí Feabhra, ba léir gur thuig na húinéirí nach n-éireodh leo ina aghaidh sa gcás, nó thuig siad nach mbeadh aon phoiblíocht mhaith le fáil as agus tháinig siad ar réiteach príobháideach leis. Ní fios cé mhéad airgid a fuair sé, ach seans maith nach raibh a dhóthain ann.
Tá rudaí sa saol atá níos tábhachtaí ná peil agus spórt, creid nó ná creid é. Ach is minic gurbh iad na lúthchleasaithe a chaitheann solas ar na mórcheisteanna sóisialta. Sheas Muhammad Ali in aghaidh na n-údarás tráth, agus d’fhulaing sé. D’íoc gleacaithe i Meiriceá as labhairt amach faoi dhochtúir a rinne ionsaithe gnéis ar ghasúir a bhí ag traenáil i dtreo na gCluichí Oilimpeacha.
Seans maith go bhfuil fulaingt déanta ag Kaepernick ón lá a rugadh é mar gheall ar an dath atá ar a chraiceann. Agus nuair a labhair sé amach, ag baint úsáid as an gcáil a bhí air, is fir gheala a chuir smacht air. Agus cén fáth nach ndéanfadh agus fear mór geal saibhir eile sa Teach Bán? Tiocfaidh an lá a bheidh náire ar Mheiriceá faoin scéal seo.
