Ní mholfainn do dhuine óg dul leis an iriseoireacht
Bhí mé lá mall ag scríobh an ailt seo agus tá mé ag cur an mhilleáin ar fad ar an am den bhliain. Ní mar gheall go raibh mé amuigh ag ragairne ag ócáid mhór ghalánta agus gradam bainisteoir na bliana á bhronnadh cosúil le gach iriseoir spóirt eile na tíre inné, ach mar gheall ar an mbrú atá orm staidéar a dhéanamh agus mo dhóthain oibre a dhéanamh chomh maith chun an cíos a íoc.
Fuair mé deis ar lá oibre inné, agus faoin am go raibh sé sin déanta agam, agus mo dhóthain staidéir déanta agam ar an mbuinneach agus na rudaí ar fad a chuireann an bhuinneach ort, ní raibh sé de chroí agam tosú ar alt, atá in ainm agus a bheith beagáinín mealltach.
Ar aon chuma, bhí mé mall ag tosú ar an alt inniu mar go raibh mé ag freagairt cúig ríomhphost agus teachtaireachtaí a tháinig agam ar na meáin shóisialta le seachtain ó dhaoine óga a bhí ag iarraidh comhairle faoin saol mór agus spéis acu san iriseoireacht nó sa tsíceolaíocht spóirt.
Agus chaith mé i bhfad an iomarca ama ag cuimhneamh orm féin. I ndáiríre, mura dtiocfaidh athrú mór ar rudaí, ní mholfainn do dhuine ar bith ceachtar den dá ghairm a dhéanamh.
Féach ar na meáin chumarsáide. I bhfad rómhinic níl aon spéis ‘i ndáiríre’ ag daoine sa ngairm seo. Tá spéis acu a bheith suite sa gcúirt nuair atá cásanna móra ar bun, nó ba bhreá leo a bheith ag na cluichí móra ar fad, nó is éard atá uathu i ndáiríre ná go mbeadh daoine á n-aithint agus ag tógáil a bpictiúr.
Ní mhaireann na daoine sin i bhfad san earnáil nuair a thuigeann siad go bhfuil obair na gcapall, go minic ar phá íseal, le déanamh sula dtiocfaidh tada den stuif mhaith sin.
Is éard atá truamhéalach i ndáiríre, ná na daoine óga atá lán smaointe, samhlaíochta, spioraid agus fuinnimh, agus a dhéanfadh iriseoirí iontach amach anseo, ach nach mbeidh an deis acu mar gheall ar an mbail atá ar an earnáil faoi láthair.
Tá an locht orainn ar fad leis an gceann seo. Níl muid sásta íoc as nuacht. B’fhearr linn é a fháil in áit eicínt saor in aisce. Tá an fios ag nuachtáin go ndearna siad botún nuair a scaoil siad a gcuid ábhar ar fad ar líne saor in aisce fadó, agus faraor, níl aon fhreagra faighte fós acu ar an gceist.
Tá RTÉ ag iarraidh fáil réidh le daoine, tá eagraíochtaí eile á dhéanamh go rialta. Idir an dá linn, tá daoine óga á spreagadh le obair in aisce a dhéanamh, rud nach bhfuil mórán in acmhainn a dhéanamh.
Má dhéanann siad é, tá daoine oilte, a bhfuil taithí acu á bhfágáil ar an trá fholamh agus ar deireadh imeoidh siadsan ón earnáil chomh maith, sa gcaoi agus go mbeidh an morgáiste íoctha.
Tá roinnt fostóirí ag baint brabúis as seo, ag saothrú oibre ó dhaoine óga nach bhfuil spéis an ghadhair acu post a thabhairt dóibh. Tá muidne, mar thomhaltóirí fágtha ar an trá fholamh freisin mar seans maith go bhfuil go leor daoine a bheadh iontach, imithe chuig earnáil eile agus níl fágtha ach daoine atá á dhéanamh go páirt-aimseartha, nó le easpa taithí.
Mar sin, ní mholfainn é don té a bheidh ag braith ar an obair. Agus nach brónach an rud é sin.
