Bean óg as Gaeltacht Chonamara a thug léi an phríomhdhuais sa chomórtas Aistritheoirí Óga 2020, a d’eagraigh an Coimisiún Eorpach agus Rialtas na hÉireann.
Is í Bláthnaid Ní Fhátharta as Coláiste na bPiarsach i Ros Muc a bhuaigh an duais mhór don saothar aistriúcháin is fearr, ceann de shé dhuais a bronnadh mar chuid den chomórtas.
Chomh maith leis an duais náisiúnta a thabhairt léi, bronnadh an duais don aistriúchán is fearr ó Bhéarla go Gaeilge a rinneadh i gCúige Chonnacht ar Bhláthnaid Ní Fhátharta chomh maith.
Is í Aoife Ní Bhriain as Coláiste Íosagáin, Baile Átha Cliath, a bhuaigh duais Chúige Laighean. Roghnaíodh saothar Chaoimhe Uí Shé as Meánscoil Chnoc na Labhras FCJ, Luimneach, do ghradam Chúige Mumhan. Clíodhna Ní Mhianáin as Gaelcholáiste Dhoire a rinne an t-aistriúchán is fearr i gCúige Uladh.
Bhuaigh dalta eile as Gaelcholáiste Dhoire, Sadhbha Nic Ruairí an t-aistriúchán is fearr ó theanga seachas an Béarla agus píosa aistrithe aici ó Fhraincis go Gaeilge.
Is é an Seanadóir Seán Kyne, Aire Stáit na Gaeltachta, a d’fhógair liosta na mbuaiteoirí inniu agus rinne sé comhghairdeachas leo.
Ghlac breis agus 90 dalta as 34 scoil ar fud na tíre páirt i gcomórtas na bliana seo agus dúirt Caoimhe Ní Shúilleabháin, Comhordaitheoir an Chomórtais sa Choimisiún Eorpach gur comhartha é an méadú sin gur “léir go mbaineann daltaí taitneamh as an dúshlán seo”.
Dúirt Ní Shúilleabháin freisin “go spreagann sé na daltaí le smaoineamh faoi theangacha ar dhóigh eile agus, tá súil agam, cuimhneamh ar na teangacha atá acu a úsáid sna gairmeacha lena rachaidh siad amach anseo”.
Ba é seo an tríú huair a eagraíodh an comórtas Aistritheoirí Óga, a bhíonn á reáchtáil ag an gCoimisiún agus Rialtas na hÉireann. Tá trí sprioc ag an gcomórtas seo: ardchaighdeán Gaeilge a chur chun cinn, an t-ilteangachas a spreagadh i measc daltaí meánscoile agus suim na ndaltaí a mhúscailt i ngairmeacha le teangacha.
Liosta buaiteoirí 2020:
An t-aistriúchán is fearr i gceithre chúige Éireann:
Bláthnaid Ní Fhátharta, Coláiste na bPiarsach, Co. na Gaillimhe
An t-aistriúchán is fearr (ó Bhéarla go Gaeilge) a rinneadh i gCúige Chonnacht:
Bláthnaid Ní Fhátharta, Coláiste na bPiarsach, Co. na Gaillimhe
An t-aistriúchán is fearr (ó Bhéarla go Gaeilge) a rinneadh i gCúige Laighean:
Aoife Ní Bhriain, Coláiste Íosagáin, Co. Bhaile Átha Cliath
An t-aistriúchán is fearr (ó Bhéarla go Gaeilge) a rinneadh i gCúige Mumhan:
Caoimhe Ní Shé, Meánscoil Chnoc na Labhras FCJ, Co. Luimnigh
An t-aistriúchán is fearr (ó Bhéarla go Gaeilge) a rinneadh i gCúige Uladh:
Clíodhna Ní Mhianáin, Gaelcholáiste Dhoire, Co. Dhoire
An t-aistriúchán is fearr ó theanga seachas an Béarla:
Sadhbha Nic Ruairí, Gaelcholáiste Dhoire, Co. Dhoire (aistriúchán ó Fhraincis go Gaeilge).
