512 cás eile den choróinvíreas a d’fhógair an Roinn Sláinte tráthnóna. Níor tugadh aon eolas maidir le líon na marbh.
Tá breis is 400,000 cás deimhnithe in Éirinn anois ó thús na paindéime, 272,848 ó dheas den teorainn agus 127,787 ó thuaidh di.
46 othar atá buailte ag an ngalar atá sna hospidéil ó dheas agus tá 14 acusan in aonad dianchúraim.
Agus é ag caint ar Morning Ireland ar RTÉ inniu, dúirt an tAire Sláinte Stephen Donnelly go raibh dlús á chur leis an gclár vacsaínithe de bharr an chontúirt a aithnítear leis an gcineál Delta den choróinvíreas atá ag leathadh go rábach ar fud na hEorpa.
Dúirt an tAire go mbeadh an dara snáthaid de vacsaín AstraZeneca faighte faoi cheann 10-11 lá ag gach duine idir 60-69 a bhfuil an chéad snáthaid faighte acu.
Ón Luan seo chugainn beidh daoine idir 18-34 bliain in ann coinne a dhéanamh i gceann ar bith den 750 cógaslann atá páirteach sa scéim ar fud na tíre chun vacsaín Janssen a fháil. Snáthaid amháin den vacsaín sin a theastaíonn.
Ar an 9 Iúil féadfaidh daoine atá idir 30-34 clárú ar shuíomh idirlín an chláir vacsaínithe agus ón 12 Iúil féadfaidh daoine idir 18-29 clárú ar an suíomh idirlín sin agus rogha a dhéanamh cé acu vacsaín AstraZeneca nó ceann Janssen atá uathu.
Agus é ina imní faoin soláthar vacsaíní, dúirt an Taoiseach Micheál Martin inniu go raibh aontaithe i bprionsabal aige féin agus Uachtarán na Rómáine, Klaus Iohannis go gceannódh an tír seo milliún dáileog de vacsaíní Pfizer agus Moderna ón Rómáin.
Is beag glacadh atá le vacsaíní sa Rómáin, an tír is lú san Eoraip ina raibh daoine sásta glacadh le vacsaín. Tá cainteanna ar siúl chomh maith ag oifigigh an rialtais le tíortha eile a bhfuil farasbarr vacsaíní acu d’fhonn an t-easnamh sa soláthar anseo a chúiteamh.
D’fhógair Roinn Sláinte Thuaisceart Éireann inniu go raibh 339 cás nua den ghalar deimhnithe. Fógraíodh go raibh duine amháin eile básaithe ansin de dheasca an víris le 24 uair an chloig.
26 othar Covid-19 atá in ospidéil an Tuaiscirt agus tá beirt acusan in aonad dianchúraim. Tuairiscíodh go bhfuil ráigeanna den ghalar i gceithre cinn d’ionaid chúraim i dTuaisceart Éireann.
Tá an chéad dáileog den vacsaín faighte ag 1,168,739 duine sa Tuaisceart agus tá an dara dáileog faighte ag 877,402 duine.
