Tá páirc sa Ghaeltacht curtha ar chrannchur chun airgead a bhailiú chun áiseanna iománaíochta agus camógaíochta a thógáil i nDoire.
Tá cumann Na Magha i mbun feachtais tiomsaithe airgid chun páirc imeartha nua a thógáil i gcathair Dhoire agus deis tugtha acu do dhaoine páirc i nGaeltacht Dhún na nGall a bhuachan.
Tá an pháirc dhá acra suite i gceantar Dhoire na nAspal, míle ó bhaile na Dúchoradh in iarthar an chontae. Deir an cumann go mbeadh an pháirc, atá gar freisin do Pháirc Náisiúnta Ghleann Bheatha, an-áisiúil do theach, do phuball nó do charbhán.
‘Páirc an phuint’ atá á tabhairt ar an bpáirc agus costas £1 ar thicéad don chrannchur. Is féidir 20 ticéad a cheannach ar £20 nó 60 ticéad a fháil ar £50.
Reáchtálfar an tarraingt Lá Fhéile Pádraig 2022 agus súil acu sa chumann go léireofar suim sa chrannchur in Éirinn agus thar sáile.
Is é cumann Na Magha an t-aon chumann iománaíochta agus camógaíochta atá lonnaithe i gcathair Dhoire agus táthar ag iarraidh airgead a thiomsú chun páirc imeartha nua a thógáil.
I ndiaidh bhunú Chumann Lúthchleas Gael ag deireadh an 19ú haois, bhí naoi gcumann iománaíochta sa chathair ach chuaigh an cluiche i léig le 60 bliain anuas.
Deir Na Magha go bhfuiltear anois ag iarraidh an scéal sin a chur ina cheart. Tá suíomh trí acra faighte ag an gcumann i dtuaisceart na cathrach agus súil acu áiseanna a fhorbairt ann.
Is féidir tuilleadh eolais agus ticéid a fháil anseo.
