Leanfar inniu agus an deireadh seachtaine seo le himeachtaí Oireachtas na Samhna 2021.
Craolfar ceolchoirm an Oireachtais ar TG4 oíche amárach. Ceolchoirm “spleodrach chroíúil” a ghealltar agus í á cur i láthair ag Máire Treasa Ní Dhubhghaill agus Joe Ó Dónaill.
Beidh fonnadóirí, damhsóirí, scéalaithe agus ceoltóirí aitheanta páirteach sa cheolchoirm agus cloisfear agallaimh bheirte agus lúibíní nuachumtha.
Bhí rogha buaiteoirí ó Oireachtas na Samhna 2019 le feiceáil sa chéad chlár aréir, na fonnadóirí Gráinne Ní Fhátharta, Sláine Ní Chathalláin agus Aodán Ó Ceallaigh agus buaiteoir Steip 2019 Ruadhán Ó Flatharta.
San oíche amárach beidh na ceoltóirí Tom Cullen, Seán de Brún agus Bethan Marsh, na scéalaithe Gearóidín Bhreathnach agus Éimhín Dalby agus dream na lúibíní agus agallamh beirte Neasa Nic Dhonncha, Éabha Ní Chonghaile, Éamon Ó Donnchadha, Fearghas Mac Lochlainn, Joe Ó Dónaill, Ray Mac Mánais agus Neans agus Micil Mac Donncha.
Idir seo agus oíche Shamhna, beidh sraith físeán á cur amach ag MOLSCÉAL TG4 ina gcaithfear súil siar ar chuimhní cinn an Oireachtais. Beidh Páid Ó Neachtain agus Brónagh Ní Uallacháin ina measc siúd a chuirfidh sceitse grinn i láthair.
Inniu, Dé hAoine, beidh foireann an fhoclóra nua Béarla Gaeilge ar Zoom ag a 1pm, tráth a ndéanfar plé ar an dul chun cinn i gcúrsaí foclóireachta le bliain anuas chomh maith leis na pleananna atá ann don bhliain amach romhainn. Seisiún saor in aisce é seo agus is féidir éisteacht leis an phlé anseo.
Ina dhiaidh sin, ag 3pm, craolfar ar Raidió na Gaeltachta Bladhaire, clár cainte agus ceoil á chur i láthair ag Áine Ní Bhreasláin, Beidh Bladhaire ag teacht beo ó Sheanscoil Sailearna, Indreabhán, Gaillimh tráthnóna agus ceiliúradh á dhéanamh ar “ceol, craic agus cultúr” na Gaillimhe.
Beidh muintir Chois Fharraige ag teacht le chéile i dTigh Chualáin agus oireachtas beag á reáchtáil go háitiúil. Beidh amhráin, sceitsí, agallaimh bheirte, damhsa agus aithriseoireacht sa teach ósta in Indreabhán ó 4.30pm. Beidh an ócáid á sruthú beo ar leathanaigh shóisialta an Oireachtais.
Meascán den scéalaíocht, amhránaíocht agus aithriseoireacht ó dhaoine óga sa Ghaeltacht a bheidh ar an bhfíseán a chraolfar ar shuíomh an Oireachtais ag a 5pm agus a léirigh Tuismitheoirí na Gaeltachta don Oireachtas.
Reáchtálfar comórtas díospóireachta Ghael Linn ag a
5.30 p.m inniu. Is í Regina Uí Chollatáin, Cathaoirleach, Foras na Gaeilge agus Ollamh le Gaeilge a bheas ina cathaoirleach ar an phlé.
Leanfar le craobhchomórtas Amhrán Úrnua ag a 8pm ag ócáid i mBaile Átha Cliath.
Amárach, an Satharn, cuirfear tús ar líne le himeachtaí an lae le hOllchruinniú do Bhaill Aontas na Scríbhneoirí ag a 11.00 a.m.
Leanfar le Siompóisiam Oidhreacht Sheáin Uí Riada ag a 2.00 p.m agus é á shruthú beo ón Mhuileann i mBaile Bhuirne. Beidh Uachtarán an Oireachtais, An tOllamh Gearóid Denvir ina chathaoirleach ar an tionól sin agus an tOllamh Tríona Ní Shíocháin, Peadar Ó Riada, an Dr John O’Keefe agus Seán Ó Sé ag caint ann.
Éire Nua agus an Ghaeilge: Deiseanna & Dúshláin in Éirinn Aontaithe is teideal do Seimineár an Oireachtais 2021, a bheas á reáchtáil ag Conradh na Gaeilge in Óstán Camden Court, i mBaile Átha Cliath ag 2.30 p.m, Dé Sathairn.
Máirín Ní Ghadhra, craoltóir le Raidió na Gaeltachta agus colúnaí le Tuairisc.ie a bheas ina cathaoirleach ar an seimineár. Beidh Micheál Ó Flannagáin, dlíodóir, Darragh Ó Caoimh, mac léinn, Ola Majekodunmi, iriseoir, agus Dáithí Mac Cárthaigh páirteach ann.
Is féidir breathnú ar sheimineár an chonartha ar líne ach clárú roimh ré ag cearta@cnag.ie
Beidh Micheál Ó Conghaile i mbun comhrá leis an scríbhneoir Micheál Ó Ruairc faoina shaol mar scríbhneoir an tráthnóna sin ag 4.30 p.m. Is é seo an chéad eagrán sa tsraith físeán ‘Saol Scríbhneora’ le Cló Iar-Chonnacht.
Leanfar le Ceolchoirm Chomórtha Sheáin Uí Riada oíche Shathairn ag 7.00 p.m. Beidh Cór Chúil Aodha agus aíonna go leor páirteach sa cheolchoirm ómóis d’fhear Chúil Aodha.
Dé Domhnaigh, beidh Aifreann an Oireachtais á chraoladh beo ag a 11.00 a.m ar RTÉ Raidió na Gaeltachta ó Shéipéal Chúil Aodha agus Cór Chúil Aodha ag ceol.
