Ar Mick O’Brien a bhronnfar ‘Ceoltóir na Bliana’ ag Gradam Ceoil TG4
Is ar an bpíobaire uilinn agus seinnteoir feadóige Mick O’Brien a bhronnfar ‘Ceoltóir na Bliana’ ag Gradam Ceoil TG4 a bheidh ar siúl i gCeoláras na hOllscoile i Luimneach an mhí seo chugainn.
Chuir Mick tús lena shaol mar cheoltóir le Club Píobairí Shráid Thómais ina chathair dhúchais Baile Átha Cliath agus é naoi mbliana d’aois. Ba mhór an spreagadh a athair, an boscadóir Dinny O’Brien, agus a mhúinteoirí Leo Rowsome, Seán Seery agus Mick Tuohy.
Is ar an amhránaí aitheanta as Cois Fharraige Sile Denvir a bhronnfar an gradam ‘Amhránaí na Bliana’ ag an ócáid chéanna.
Is amhránaí ar an sean-nós, cláirseoir agus bean léinn í Síle a bhfuil tionchar láidir ag an nGaeilge, an tógáil a fuair sí i nGaeltacht Chonamara agus stíl sean-nóis an réigiúin ar a cuid ceoil.
Fógraíodh faighteoirí na ngradam sin agus ceithre ghradam eile ag ócáid speisialta a bhí ar siúl sa CASK i gcathair Luimnigh tráthnóna.
Ní bheidh ar Mick, Louise, agus Michelle Mulcahy dul chomh fada sin as baile leis an ngradam ‘Grúpa Ceoil na Bliana’, gradam nua a tugadh isteach anuraidh, a bhailiú. Is as Mainistir na Féile an teaghlach ceolmhar a bhfuil ceithre albam curtha amach acu le chéile ina léirítear na stíleanna agus stóir ceoil a bhaineann le Sliabh Luachra, an Clár agus Oirthear na Gaillimhe – The Mulcahy Family (1999), Notes From the Heart (2005), Reelin in Tradition (2009), agus The Reel Note (2016).
Is í Méabh Smyth, as Ard Mhacha, ‘Ceoltóir Óg na Bliana’. Is fidléir í Méabh atá ag casadh ceol traidisiúnta ó bhí sí seacht mbliana d’aois. Ní ón talamh a fuair Méabh a cuid ceoil ós fidléirí iad a beirt thuismitheoirí Rosie agus Thomas Smyth agus casann sí ceol go rialta lena deartháir Tiarnán agus a deirfiúr Annie. Chuir an bheirt acu EP amach faoina n-ainm féin tamall de bhlianta ó shin agus bhain an bheirt acu ait amach sa bhabhta leathcheannais ag Ceoltóir Óg Tíre na Bliana i gcomórtas de chuid an BBC in 2017.
Níos luaithe i mbliana bhí Méabh san iomaíocht i mbabhta ceannais Chomórtas Bhonn Óir Sheáin Uí Riada in éineacht lena deirfiúr. Bhuaigh sí gradam Ed Reavy d’Fhidléir na Bliana sa bhliain 2016 agus bhuaigh sí an chéad duais sa chomórtas Fidléir London sa bhliain 2021.
Ar na faighteoirí gradaim eile a fógraíodh tráthnóna bhí Fintan Vallelly, a gheobhaidh Gradam Saoil TG4, agus Maurice Lennon, a gheobhaidh an gradam ‘Cumadóir na Bliana’ i gCeoláras na hOllscoile i Luimneach ar an 23 Aibreán.
“Tá ríméad ar TG4 ómós a thabhairt do cheoltóirí agus amhránaithe iontacha leis an nGradam Ceoil atá 26 bhliana ar an bhfód i mbliana. Tá súil againn go leanfaidh an Gradam de bheith ina chomhartha ar bharr feabhais ealaíne amach anseo i ngach réimse den cheol agus den amhránaíocht atá dúchasach d’Éirinn.
“Comhghairdeas leis na daoine ar fad a bheidh ag fáil gradaim. Táimid ag tnúth le bheith ag ceiliúradh in éineacht leo agus fáilte a chur roimh lucht féachana ó chian is ó chóngar an mhí seo chugainn,” a dúirt Proinias Ní Ghráinne, eagarthóir coimisiúnaithe TG4.
Is painéal moltóirí neamhspleách a roghnaíonn buaiteoirí Ghradam Ceoil TG4 gach bliain. Bronnfar píosa dealbhóireachta leis an dealbhóir mór le rá, John Coll, a coimisiúnaíodh go speisialta, ar na buaiteoirí chomh maith le suim bheag airgid.
Craolfar Gradam Ceoil TG4 beo ó Luimneach ar TG4 ar an 23 Aibreán ag 21.30.
