Tá cead pleanála faighte ag Comharchumann Chorca Dhuibhne le trí theach a thógáil a chuirfí ar fáil do theaghlaigh as an cheantar ar mian leo scoláirí a choinneáil.
Beidh na tithe á dtógáil ar thalamh Chomharchumann Chorca Dhuibhe sna Cluainte i mBaile an Fheirtéaraigh agus ar fáil ar chíos réasúnta do theaghlaigh ar mhian leo cónaí iontu i rith na bliana agus scoláirí a choinneáil do chúrsaí an tsamhraidh.
Tá tógáil na dtithe mar chuid den phlean atá ag Coláistí Chorca Dhuibhne le dul i ngleic leis an ghanntanas ban is fear tí.
Ag labhairt dó ar an chlár An Saol Ó Dheas inné, dúirt Bainisteoir Chomharchumann Chorca Dhuibhne, Páidí Ó Sé go rachadh an togra seo chun tairbhe dá lán, gur “win win” atá ann do Choláistí Chorca Dhuibhne agus do theaghlaigh sa cheantar a mbíonn deacrachtaí acu tithe a fháil le cónaí iontu.
“Seanscéal atá ann. Tá deacracht teacht ar mhná tí. Tá deacracht ag teaghlaigh ón áit tithe a d’fháilt.
“Déanann a haon agus a haon a dó de ghnáth agus tá sé chomh simplí leis sin, go gcuirfimid daoine ón áit go bhfuil Gaelainn acu isteach sna tithe sin mar is ea is fearr é, agus go mbeadh sórt dualgas orthu cúig chúrsa a dhéanamh i rith na bliana do na coláistí. Sásóidh sé sin na coláistí agus na daoine ón áit.”
Dúirt Ó Sé gur tithe “breátha” a bheas iontu ach go mbeadh airgead stáit ag teastáil chun na tithe a thógáil.
“An t-eolas atá againn ó mhná tí agus ó fhir tí, bíonn siad beagáinín míchompordach scoláirí a choinneáil ina dtigh féin, beidh na tithe seo leagtha amach do scoláirí. Beidh áit speisialta ann don tigh agus áit speisialta ann do na scoláirí.
Ag labhairt dó le Tuairisc cheana faoin iarratas ar chead pleanála a cuireadh faoi bhráid Chomhairle Contae Chiarraí dúirt Ó Sé gur cur chuige ‘nua’ don choláiste é a bheith ag tógáil tithe ach go bhfuil sé déanta cheana ag coláistí eile a raibh deacrachtaí acu mná tí a mhealladh.
“Bhí traidisiún an-simplí againn i gCorca Dhuibhne. Bhí mná tí ann ar leo na tithe ach anois tá muid ag tarraingt mná tí isteach, agus is múnla é atá in úsáid ag coláistí eile i gCúige Mumhan agus i gCúige Chonnacht a mbíonn deacracht acu mná tí a fháil,” a dúirt Ó Sé.
Mar chuid den iarracht atá ar siúl ag lucht Choláistí Chorca Dhuibhne tuilleadh lóistín a fháil do scoláirí, táthar chun athchóiriú a dhéanamh ar sheanchlochar taobh thiar de Bhaile an Fheirtéaraigh, ar leis an chomharchumann é, agus é a chur ar fáil do theaghlach Gaeltachta a bheadh sásta lóistín a chur ar fáil do scoláirí.
Tá plean eile ag Coláistí Chorca Dhuibhne ionad óige agus oideachais a thógáil ar láthair an champais, ionad ina mbeadh spás lóistín a chur ar fáil do 140 scoláire.
Tháinig laghdú mór ar líon na scoláirí a d’fhreastail ar chúrsaí Choláiste Chorca Dhuibhne anuraidh mar gheall nach raibh go leor tithe ar fáil le scoláirí a choinneáil.
D’éirigh triúr déag ban tí as na scoláirí i gceantar Chorca Dhuibhne anuraidh, agus tá líon na mban tí laghdaithe 27% ó 2019.
Bhí 400 leaba ar fáil do chúrsaí Choláistí Chorca Dhuibhne an samhradh seo caite i gcomparáid le 525 leaba in 2019.
Dúirt Ó Sé go raibh géarghá le teacht ar “shlite cruthaitheacha” chun dul i ngleic leis an laghdú atá tagtha ar líon na mban agus fear tí.
“Tá na rudaí seo á dtriail againn chun an brú ó thaobh lóistín de a laghdú agus chun a chinntiú go mairfidh an coláiste sa cheantar,” a dúirt Ó Sé.
