Raidió Rí-Rá ag imeacht de na haerthonnta FM tar éis tréimhse thrialach deich seachtaine
Tiocfaidh deireadh leis an tréimhse thrialach a bhí ag Raidió Rí-Rá ar na haerthonnta FM ar fud na tíre ag an deireadh seachtaine. Bhí an cairtstáisiún Gaeilge á chraoladh beo ar raidió FM i mBaile Átha Cliath, Luimneach, Corcaigh agus Gaillimh gach deireadh seachtaine ó bhí Seachtain na Gaeilge ann i mí an Mhárta.
Bhí láithreoirí Raidió Rí-Rá le cloisteáil beo gach Satharn agus Domhnach sna ceithre chathair chomh maith leis an suíomh idirlín agus aipeanna an stáisiúin ar na córais Android agus iOS.
Tá “deireadh seachtaine spleodrach” geallta ag lucht Raidió Rí-Rá d’éisteoirí an stáisiúin don deireadh seachtaine deireanach a bheidh acu ar an aer agus “comórtais, sceideal speisialta lán le haíonna agus aoiláithreoirí, neart ceoil agus craice”.
Bhí aoiláithreoirí éagsúla le cloisteáil ar an aer i gcaitheamh na tréimhse trialaí, ina measc Sinéad Ní Uallacháin ó Beo Ar Éigean, Rút Ní Theimhneáin ó BLOC, Aindriú de Paor ó RTÉ 2FM, an Kerry Cowboy Séaghan Ó Súilleabháin, Lucy Nic Aindrís ó Na Gael Gals, agus Cian Ó Gríofa nó ‘Gaylgeoirí’ mar is fearr aithne air.
“Is iontach an deis í seo le bronnadh ar ár gcraoltóirí – tá taithí luachmhar á fáil agus chuile dhuine acu agus iad ag craoladh beo ar ardán náisiúnta. Tá an tréimhse seo théis ardú meanman a thabhairt dúinn ar fad, agus is iontach a chloisteáil go bhfuil sé ag dul i bhfeidhm ar éisteoirí fud fad na tíre chomh maith.
“An sprioc atá againn ná seirbhís don aos óg a sholáthar ar ardán náisiúnta FM go lánaimseartha seacht lá na seachtaine 24 uair an chloig in aghaidh an lae, agus seo céim dhearfach i dtreo na sprice sin,” a dúirt bainisteoir Raidió Rí-Rá Emma Ní Chearúil.
Beidh cláracha le Hugh Carr agus Conall Mac Dhonnagáin; Seán Ó Dubhchon; Louise Cantillon; agus na podchraoltóirí ‘Na Seansálaithe’ le cloisteáil le linn an chraolta speisialta an deireadh seachtaine seo ar 105.2fm (Baile Átha Cliath), 106.7fm (Corcaigh), 105.5fm (Luimneach), agus 87.7fm (Gaillimh).
Dúirt Traic Ó Braonáin, cathaoirleach Raidió Rí-Rá, gur bhreá le lucht an stáisiúin dá mbeadh an deis ann craoladh ar FM “go leanúnach” agus go mbeadh an stáisiún Gaeilge le cloisteáil “timpeall na tíre i gcónaí”.
“Tá éileamh ann, tá éisteoirí ann, agus tá an struchtúr i bhfeidhm cheana,” a dúirt sé.
