Beidh craoladh i nGaeilge ar mhórócáidí spóirt ar cheann de na hábhair a ndéanfar plé orthu ag cruinniú de Choiste Meán an Oireachtais inniu.
Beidh Ardstiúrthóir TG4, Alan Esslemont, i láthair ag an gcruinniú seo faoina bhfuil i ndán don chraoltóireacht spóirt in Éirinn.
Dúirt urlabhraí ó TG4 le Tuairisc go raibh lucht an stáisiúin ag súil deis a fháil plé a dhéanamh ar chás na Gaeilge sa chraoltóireacht spóirt.
Tá Alan Esslemont den tuairim gur cheart ceist na teanga a chur san áireamh agus liosta á chur le chéile de mhórimeachtaí ar gá iad a chraoladh saor in aisce ar an teilifís.
Dúirt sé le Coiste Oireachtais eile mí Eanáir “gur cheart go mbeadh leithéid na gCluichí Ceannais Craoibhe Sinsir CLG ar fáil beo i nGaeilge leis an leibhéal céanna léiriúcháin agus a chuirtear ar fáil don léiriúchán i mBéarla”.
D’fhógair RTÉ mí Aibreáin go rabhthas chun craoladh iomlán i nGaeilge, le láithreoir agus anailísí, a dhéanamh ar chluichí ceannais iomána agus peile na hÉireann i mbliana den chéad uair riamh.
Beifear ag díriú ar GAAGO, cainéal nua íoc ar amharc Chumann Lúthchleas Gael agus RTÉ, an cainéal ar ar craoladh roinnt cluichí tábhachtacha sna craobhacha peile agus iomána i mbliana.
Tá ráite cheana ag daoine, ina measc Seán Kelly, iar-uachtarán de chuid CLG agus Feisire Eorpach, gur cheart deireadh a chur le GAAGO agus níos mó cluichí móra beo a thabhairt do TG4.
Tharraing an cainéal íoc ar amharc seo roinnt mhaith conspóide i rith an tsamhraidh agus cuid mhaith daoine ag áitiú gur chóir go mbeadh na príomhchluichí Gaelacha ar fad le feiceáil saor in aisce ar an teilifís.
Déanfaidh Cumann Lúthchleas Gael craoltaí conspóideacha GAAGO a chosaint go láidir agus iad ag agairt nach bhfuil sé réadúil a bheith ag súil go mbeadh gach uile chluiche idirchontae sa Chraobh le feiceáil ar an teilifís.
Is comhfhiontar idir CLG agus RTÉ é GAAGO agus is ag an gcainéal sin amháin a bhí na cearta beochraolta do 38 cluiche sna craobhacha peile agus iomána i mbliana. Is cosúil gur chun an clúdach a bhíodh ar Sky ar chluichí Gaelacha a chur ar fáil a cruthaíodh GAAGO.
Chosain pas do chluiche amháin €12 ar dhuine, gheofá 3 chluiche ar €24 agus an séasúr ar fad ar €79. Is ar an ardán sin is mó a craoladh cluichí Sathairn na bliana seo agus ar RTÉ a bhí cluichí an Domhnaigh.
Tá sé le maíomh ag CLG gur mó ná riamh an méid cluichí atá le feiceáil saor in aisce ar an teilifís anois agus na cluichí a bhíonn á dtaispeáint ar GAAGO faoi láthair “gur ar Sky TV a bheidís roimhe seo, sin nó nach mbeidís á gcraoladh beo ar an aer beag ná mór”.
Ar na ceisteanna eile a cheaptar a phléifear ag Coiste na Meán, tá cearta craoltóireachta agus na cineálacha comhpháirtíochta ba mhaith le CLG a réiteach le craoltóirí.
Bíonn TG4 agus craoltóirí eile ag brath go mór ar chraoladh beo ar an spórt dá gcuid sceideal.
