Leabhra an tSamhraidh – moltaí leabhar don trá
Is oth liom an nuacht seo a bhriseadh, ach tá an lá is faide sa bhliain imithe tharainn agus mar sin táimid ag druidim aríst i dtreo an gheimhridh. Agus saoire in áirithint ag cuid mhór againn, seans go bhfuil ábhar léitheoireachta á lorg agat. Mar sin seo chugat an liosta des na leabhair go dteastaíonn uaim féin a léamh an samhradh seo. Tá súil agam go mbeidh inspioráid éigint ann díbh!
Hurlamaboc Éilís Ní Dhuibhne (Cois Life €10)
An dteastaíonn uait siúl siar ar bhóithrín na smaointe? Seans go raibh cuid den scéal seo ar churaclam na hArdteiste nuair a dheinis é. Bhí sé agamsa ach go háirithe, agus is cuimhin liom go maith aiste a fhoghlaim de ghlanmheabhair ar shaol Lisín agus Pól a chur i gcomparáid le leithéidí The Stepford Wives (ná raibh léite agam ag an am!) agus Desperate Housewives (a bhí feicthe agam ó thús deiridh cúpla babhta fén dtráth san). Leabhar a thabharfainn liom ar laethanta saoire toisc cuid den scéal léite agam, é bunaithe ar thriúr déagóirí ó aicmí difriúla, agus ós rud é gur dírithe go príomha ar dhaoine óga, bheinn ag súil ná fuil sé róthrom!
An Grá Riabhach Biddy Jenkinson (Coiscéim €6.50)
Cnuasach “gáirscéalta” atá sa leabhar seo ina bhfuil ocht ngearrscéal déag. Más maith leat rogha ábhar agus téamaí i sraith gearrscéalta, ach iad a bheith snaidhmthe le chéile, b’fhiú cóip de seo a aimsiú is a thabhairt leat. Is bean mhór gearrscéalta mé féin agus níl rud ar bith níos fearr ná ceangal a bheith idir eatarthu. Ag tnúth leis an gceann seo!
Dúnmharú sa Daingean Éilis Ní Dhuibhne (Cois Life €10)
Cuirim saoire agus scéalta dúnmharaithe le chéile im’ aigne go minic. Go háirithe toisc go bhfuil ana-chuid acu lonnaithe in áiteanna go dtéann daoine ar saoire. Suite cois farraige, ag léamh fé dhuine a dúnmharaíodh go mistéireach, cois farraige? Go diail. Tá ardmholadh ag daoine den úrscéal seo agus táim ag súil go mór le luí isteach sa cheann seo nuair a bheidh sé á léamh agam ar thrá Fionntrá an deireadh seachtaine seo le caifé deas ó Bean in Dingle (cén Ghaelainn atá ar Staycation aríst?!).
Meascra ón Aer Marcas Mac Conghail [eag.] (Coiscéim €10)
Chun a bheith macánta, tá an ceann seo léite agam cheana agus mar sin níl sé go teicniciúil ar mo liosta le léamh, ach is ceann ana-oiriúnach é don samhradh. Cnuasach d’aistí, gearrscéalta, cuimhní cinn agus eile atá sa leabhar seo, mar sin ní gá scéal fada a leanúint agus tá sé fíor éasca é a phiocadh suas, agus a leagadh síos aríst tar éis cúpla leathanach a chur díot. Tá ábhar idir éadrom agus trom, greannmhar agus brónach ann agus is turas léitheoireachta pléisiúrtha é don tsaoire!
…agus gan dabht, ní féidir linn dearmad a dhéanamh ar na leanaí!
Orla Uan i gClós na Feirme Eibhlín Uí Iarlaithe (Oidhreacht Chorca Dhuibhne – €10)
I measc an rogha iontach leabhair Ghaelainne atá ann don aos óg, tá Oidhreacht Chorca Dhuibhne díreach tar éis an séú leabhar sa tsraith Orla Uan, a sheoladh. Is leabhar é seo, scríte ag an údar Eibhlín Uí Iarlaithe agus maisithe go cruthaitheach ag Dómhnal Ó Bric, fé Orla Uan agus a cairde, agus iad ar eachtra i gclós na feirme. Suite i nGaeltacht Chorca Dhuibhne agus scríte sa chanúint chéanna ach ní gá do thuismitheoirí a bheith buartha – tá gluais ar chúl an leabhair a mhíníonn na háiteanna nuair a bhriseann an chanúint ón gcaighdeán, agus tá cód QR handáilte ar chúl chun gur féidir leis an údar an leabhar a léamh duit!
N’fheadar fútsa ach táimse ag súil go gcuirfeadh cúpla leabhar deas borradh fé mo chuid léitheoireachta agus go mbeidh aimsir bhreá agam chun iad a léamh, cois na trá!
