Cumann nua reatha do Ghaeil Chorcaí
Beidh an chéad chruinniú den ghrúpa reatha Gaeilge nua, ‘Rith Rá’, ar siúl i gCathair Chorcaí Dé Luain seo chugainn.
Is idir rith agus chaint a bheidh ar bun acu siúd a fhreastalóidh air, is cuma cén caighdeán Gaeilge atá ag na daoine a théann chuige ná luas a gcos ar an fhód fad is atá siad toilteanach iarracht a dhéanamh tabhairt faoin aclaíocht agus faoin Ghaeilge.
“Phioc mé an t-ainm ‘Rith Rá’ don ghrúpa reatha seo mar thagairt don fhocal ‘rírá’, agus é á chur leis na focail ‘rith’ agus ‘rá’ mar léiriú ar an dá rud bhunúsacha sa ghrúpa seo. Thosaigh mé an grúpa toisc go raibh mé i mbun aclaíochta nuair a bhí mé níos óige agus chuaigh mé go dtí Coláiste Chríost Rí i gcathair Chorcaí, meánscoil a chuireann an-bhéim ar an nGaeilge, agus áit a bhfuair mé suim sa Ghaeilge.
“Thosaigh mé ag dul go dtí an grúpa ‘Sos Lóin’, ciorcal comhrá atá i gcathair Chorcaí agus bhí sé ag teastáil uaim mar sin chun rud éigin a dhéanamh chun an Ghaeilge a chur chun cinn sa cheantar; agus le linn dom freastal ar Shos Lóin, cheap mé go raibh sé saghas éasca grúpa mar seo a bhunú,” a dúirt bunaitheoir an chumainn, Cormac Ó Liatháin, le NÓS.
Dúirt Ó Liatháin chomh maith gurb é an sprioc atá aige leis an ghrúpa seo sa bhunú ná áis sa bhreis a thabhairt do dhaoine lena gcuid Gaeilge a chleachtadh is cuma cén caighdeán atá acu, ar bhealach a chuireann leis an éagsúlacht deiseanna atá ar fáil i gcathair Chorcaí cheana féin an Ghaeilge a chleachtadh agus a labhairt.
“Ba bhreá liom go mbeadh gach duine a théann ann in ann eispéireas maith a bheith acu ann agus go bhfuil siad sásta Gaeilge a labhairt agus go bhfuil áit eile ann acu le Gaeilge a labhairt. Tuigim go bhfuil ciorcal comhrá sa chathair agus in áiteanna eile agus tá Pop-Up Gaeltacht ann freisin agus tá suíomh difriúil ag baint leis sin sa teach tábhairne, agus cheap mé mar sin go mbeadh suíomh eile go maith chun teanga a fheabhsú,” a dúirt sé.
Beidh Rith Rá ag bualadh den chéad uair ag 18.00 Dé Luain 19 Iúil ag Páirc Ghleann na Trá Móire i ndeisceart chathair Chorcaí agus cuirfear fáilte roimh aon duine atá ag iarraidh Gaeilge a chleachtadh le daoine eile. Is féidir tuilleadh eolais a fháil ag leathanach Twitter an chumainn chomh maith.
