10 mbronntanas don snámhaí mara
Is beag duine anois nach bhfuil duine gaolta leo sáite isteach sa chultas nua is mó atá ag réabadh na tíre le hos cionn bliana…na snámhaithe mara.
Is mór an t-ionadh dom go bhfuilim féin ina measc, agus mé do mo thumadh féin san uisce fuar go rialta na laethanta seo, údar mór uafáis do mo bharraicíní bochta! Baisteadh mé féin isteach san fharraige agus sa ghrúpa snámha laethúil in Inis Meáin siar i mí na Bealtaine agus táim ag snámh leo ó shin. Is cairdiúil, crua agus craiceáilte an dream iad agus is uathu siúd a fuair mé na smaointe don liosta seo; bronntanais Nollag don snámhaí mara.
Mála gualainne ó Love Letter Arts
Is as Baile Átha Cliath d’Aisling ó Love Letter Arts agus tá réimse leathan earraí aici a bhfuil baint acu leis an snámh mara, ó mhálaí gualainne go cupáin. Is breá liom féin an mála gualainne seo thíos a bhfuil Gaeilge bhreá le feiceáil air agus neart spáis do do thuáille agus giuirléidí snámha.
€22 ag Love Letter Arts
Buidéal uisce te
Ní féidir mbuidéal uisce te a shárú le fáisceadh leat tar éis duit tú féin a thriomú. Le deireanas, tá gléas iontach tagtha ar an saol a dhéanfadh bronntanas sármhaith don snámhaí i do shaol, an buidéal uisce te fada. Tá an buidéal seo thíos ar fáil ó Guineys ar líne ach bíonn siad ar díol i roinnt siopaí sa fíorshaol freisin; Penneys ar cheann acu. Mura mbeidh tú in ann barróg a thabhairt do dhuine an Nollaig seo, d’fhéadfadh an mbuidéal seo a bheith beagnach chomh maith leis.
€15.99 ó Guineys.
Snámhán tarraingthe
Don té a mbíonn ag snámh go rialta nó ag ciansnámh, is fiúntach ar fad snámhán lonrach a bheith acu. An buntáiste is mó a mbaineann leo ná feiceálacht agus sábháilteacht, go mbeidh sé níos fusa teacht i dtarrtháil ar dhuine má théann siad i sáinn. Tá snámháin eile ann a mbíonn mála tirim iontu freisin, agus d’fhéadfadh le duine eochracha nó rudaí beaga eile a choinneáil slán ann.
€26.95 ag Safe Swimmer
Stocaí neoipréine
Ní rachfá isteach ag cogadh gan do chuid cathéide ort, cén fáth mar sin a rachfá isteach san fharraige fhuar gheimhridh gan stocaí neoipréine ort? Coinneoidh na stocaí seo ó Wetsuit Outlet do bharraicíní slán ó fhuacht an uisce.
€28.99 ó Wetsuit Outlet
Cupán taistil Black and Blum
Ceann de na rudaí is deise faoin snámh mara ná an chaint agus an comhluadar ina dhiaidh. Is iontach an uirlis é cupán ceart taistil ag an bpointe seo, le deoch te, blasta a bheith ag fanacht le duine a théamh ón taobh istigh agus chun an ruaig a chur ar na cáithníní. Coinneoidh an cupán seo deoch te ar feadh cúig uaire an chloig agus gealltar dúinn nach scaoilfear braon amach.
€21.96 ó Coffee Shop.ie
Róba Cois Farraige
Tá an-tóir agus an-chuid cainte ar na brandaí róbaí éagsúla do snámhaithe agus is beag acu nach bhfuil ar ardchaighdeán dáiríre. Dea-sampla ná Cois Farraige ó chontae Mhaigh Eo; róba uiscedhíonach, gaothdhíonach líneáilte le lomra. Téann €1 ó gach ceannachán chuig an Irish Wildlife Trust.
€110 ag Cois Farraige Robes
Bróga na gCrogall
Má tá an snámhaí i do shaol dáiríre faoin gcaitheamh aimsire, beidh slán fágtha acu le faisean le fada. Ar catwalk na céibhe, is iad bróga na gCrogall is mó a bhfuil tóir orthu, go háirithe na cinn seo thíos a bhfuil lomra iontu.
€40 ag JD Sports.
Hata teolaí ‘Cailín’ ó Joanne Hynes ag Dunnes Stores
Más bean nó cailín í an snámhaí i do shaol, is mór an seans go dtaitneoidh an hata teolaí, snasta seo ó Joanne Hynes i Dunnes Stores leo. Tá an-borradh ar réimse na n-earraí Gaeilge atá ar fáil in Dunnes le blianta beaga anuas agus sampla iontach den iarracht úd ná an hata breá seo, foirfe do cluasa fuara atá tar éis teacht amach ón bhfarraige.
€20 ag Dunnes Stores.
Déantar na mataí geala seo ó phíosa AstroTurf a bheadh ag dul go láithreán líonadh talún. Coinníonn siad na cosa slán ó nithe beaga ar an talamh agus an snámhaí á ghléasadh féin agus cosnaíonn siad ó fhuacht na talún iad freisin. Ar fáil ó Viking Marine, Baile Átha Cliath ar €26.95.
