Tá sé fógartha ag Aire na Gaeltachta go bhfuil €500,000 le cur ar fáil chun ceannáras Chonradh na Gaeilge i mBaile Átha Cliath a fhorbairt.
Agus í ag labhairt sa Dáil, dúirt an tAire Catherine Martin go raibh an t-airgead le cur ar fáil mar chuid den €4.2 milliún breise a bhí faighte ag a Roinn i mBuiséad 2024 do chúrsaí Gaeilge agus Gaeltachta.
Thug an tAire tuilleadh eolais maidir le leithdháileadh an airgid bhreise ach mar sin féin ní léir go díreach go fóill cá mbeidh an maoiniú ar fad ag dul.
Is sa Dáil a thagair sí den chéad uair go mbeadh airgead caipitil le cur ar fáil chun ceannáras Chonradh na Gaeilge ag Uimhir 6 Sráid Fhearchair a fhorbairt mar lárionad Gaeilge.
Fuair an Conradh cead pleanála ag deireadh 2020 chun a gceannáras a fhorbairt mar lárionad Gaeilge. Is í an chéad chéim eile san obair forbartha ná dearadh sonrach a dhéanamh ar na háiseanna a chuirfí ar fáil sa spás nua. Tá caifé agus stiúideo raidió nua i measc na n-áiseanna a d’fhéadfaí a thógáil ansin, dar le Conradh na Gaeilge.
Agus é ag labhairt in 2020 nuair a bronnadh an cead pleanála don lárionad, dúirt Aire Stáit na Gaeltachta ag an am, Jack Chambers, go mbeadh an spás nua “mar áit lárnach d’fhoghlaimeoirí Gaeilge agus Gaeilgeoirí Bhaile Átha Cliath” agus go gcuirfeadh sé go mór le “feiceálacht na teanga agus stádas na Gaeilge sa chathair”.
Ag labhairt di sa Dáil aréir, dúirt an tAire Catherine Martin gur €1 milliún a chuirfeadh a Roinn ar fáil faoi Bhuiséad 2024 ar mhaithe le scéim nua a chur ar bun a thacóidh le múinteoirí scoile agus oibrithe in earnáil an luathoideachais “barr feabhais a chur ar a gcuid scileanna teanga”.
Luaigh sí freisin go mbeadh €1.1 milliún breise ann do bhuiséad riaracháin Údarás na Gaeltachta, go mbeadh €500,000 ar fáil chun daoine óga faoi mhíbhuntáiste a chur chuige coláistí samhraidh na Gaeltachta agus go mbeadh €500,000 breise ann do chur i bhfeidhm an Achta Teanga.
Cháin urlabhraí Gaeilge agus Gaeltachta Shinn Féin Aengus Ó Snodaigh buiséad an Rialtais arís agus dúirt gur léir gur “cuma sa sioc” leis an Rialtas faoin Ghaeilge a chaomhnú nó a chur chun cinn.
