Triail na hÉireann ar Chorn an Domhain sa Rugbaí scortha ag an Nua-Shéalainn
Agus sin é. Corn an Domhain sa Rugbaí eile, agus cailliúint eile sa chluiche ceathrú ceannais. Ar chúis éigin, gortaíonn an ceann seo i bhfad níos mó.
Ba í seo an fhoireann Éireannach is fearr dá bhfaca mé riamh. Bhí gach rud acu. Ionsaí láidir. Smacht cosanta. Ach níl tábhacht ar bith leis anois. Mura bhfuil tú ag ardú an choirn ag deireadh an chomórtais, is cuma cad a rinne tú ann. Is é an bua atá tábhachtach. Chuir an Nua-Shéalainn isteach ar Éirinn i ngach aon slí a d’fhéadfaidís. Dhún siad an bhearna sa síneadh amach. Níor thug siad aon chlibirtí ionsaithe d’Éirinn. Thairis sin, mhoilligh siad an ruc chomh mór agus a d’fhéadfaidís, go minic ag íobairt leithead sa chosaint chun cur isteach ar ionsaí na hÉireann. Agus d’oibrigh sé.
Ach mar a dúirt mé, sin sin. Ní miste a bheith ag caint faoi sheansanna na hÉireann sa Chorn Domhanda Rugbaí óir tá deireadh leo. Agus bogfaidh an comórtas agus an spórt ar aghaidh.
Beidh an URC ag tosú arís an deireadh seachtaine beag seo agus déarfainn go bhfuil go leor de lucht leanúna na hÉireann ag tnúth le rud éigin chun a n-intinn a bhaint as an méid a tharla don fhoireann náisiúnta. Beidh na ceithre chúige ar fad ag tabhairt chun páirce ag iarradh tús maith a chur leis an gcomórtas.
Tá an cluiche oscailte is fusa ag na cúigí ag Cúige Uladh, agus iad ag tabhairt aghaidh ar Zebre san Iodáil. Níl ach cluiche amháin buaite ag Zebre le dhá shéasúr anuas agus beidh Cúige Uladh ag iarraidh scór mór a chur orthu. Mura dtarlaíonn míorúilt, ní bheidh ann ach toradh amháin air.
Tá Cúige Mumhan sa bhaile i bPáirc Thuamhan i gcoinne na Sharks, leis na seaimpíní ag dul i gcoinne foireann a chríochnaigh san ochtú háit an séasúr seo caite. Tá na Sharks gan a n-ainmneacha móra, agus iad ag tabhairt aghaidh ar Shasana sa Fhrainc an deireadh seachtaine seo, ach beidh Cúige Mumhan ag iarraidh a séasúr a thosú go maith le bua baile.
Tabharfaidh Connachta, a shroich an cluiche leathcheannais an bhliain seo caite, aghaidh ar na Ospreys. Níor bhuaigh na Ospreys ach cúig chluiche an séasúr seo caite (tar éis deich gcluiche a bhuachan an bhliain roimhe sin sa chomórtas). Ach beidh Connachta ag iarraidh leas a bhaint as a bheith sa bhaile agus leanúint lena ndea-fhoirm ón mbliain seo caite agus féachaint cad is féidir lena síniú nua a dhéanamh.
Agus ar deireadh, tá Cúige Laighean as baile go Glaschú. Chaill Cúige Laighean tromlach a n-imreoirí tosaigh ar fhoireann na hÉireann agus mar sin beidh dúshlán doimhneachta acu. Theip ar Chúige Laighean corn a bhuachan le cúpla séasúr anuas agus beidh Glaschú ag iarradh a gcuid seansanna a ghortú go luath i mbliana.
Forbairt thábhachtach atá sa chomórtas i mbliana gur na hocht bhfoireann is fearr amháin a ghnóthóidh áit i gCorn na Seaimpíní don bhliain seo chugainn. Ní bheidh áit ag aon fhoireann eile, ba chuma faoi na buaiteoirí scéithe, agus cuirfidh sé seo brú níos mó fós ar fhoirne ón tús.
The post Triail na hÉireann ar Chorn an Domhain sa Rugbaí scortha ag an Nua-Shéalainn appeared first on NÓS.
