Tús leis an tsraith peile agus tús níos fearr arís ag na foirne Uladh
Más iad an bás agus cáin an dá rud atá cinnte sa saol, is iad an fhearthainn agus an ghaoth na deimhneachtaí amháin a thagann le séasúr úr na sraithe peile. An méid sin agus bua Mhuineacháin i gcoinne Átha Cliath, is dóigh.
Chuir Ciarán McNulty scór simplí thar an trasnán sa bhomaite deireanach d’am cúitimh oíche Shathairn i bPáirc an Chrócaigh – ag cur cúilín idir na foirne agus bliain eile le curiarracht na Muineachánach leis. Níor chaill siad i gcoinne Átha Cliath sa tsraith ó bhí 2017 ann, le cúig chraobh uile-Éireann buaite ag fir na príomhchathrach sa tréimhse chéanna. Ní beag sin do dhaonra imeartha chomh beag.
Bhí an toradh sin mar chuid de phríomhthéama an deireadh seachtaine ar fad, ina raibh an bua ag gach foireann Ultach seachas Fear Manach – rogha na coitiantachta le dul síos ó Roinn 2 – a fuair comhscór creidiúnach i gcoinne na Mí.
Ní haon iontas é go mbeadh Mickey Harte meáite ar an tsraith agus ar chluiche i dTrá Lí araon, ach is ráiteas amach is amach a leagadh lena mbua ar Chiarraí oíche Shathairn. Tugadh dúshlán do Thír Eoghain chun léiriú nach iad an fhoireann is mó atá i mbaol a ndícháilithe i Roinn 1, agus bhí Dáire Canavan sásta tabhairt faoi sin ina aonar i gcoinne Ros Comáin.
Beidh faoiseamh ar Ard Mhacha i ndiaidh dóibh an Lú a shárú leis an bhearna is lú. Tá spriocanna ardú céime an Chabháin agus an Dúin sláintiúil beo lena mbuanna suntasacha thar Chill Dara agus Cill Mhantáin faoi seach, agus beidh áthas ar Aontroim nár éirigh le Luimneach teacht aniar orthu sa dara leath.
Ach an scéal Ultach is suntasaí a tháinig amach as an chéad deireadh seachtaine den tsraith ná filleadh Jim McGuinness ar a dhúchas i nDún na nGall – agus ráiteas dá gcuid féin leagtha ag a fhoireann le hardscór cláraithe acu in aghaidh Chorcaí.
Sna cúinsí aimsire atá mar dhlúthchuid de Páirc Sheáin Mhic Cumhaill ag am seo na bliana, ní beag an t-éacht é 1-20 a ghnóthú ar an chéad lá amuigh. Is mó an t-éacht a bhí i gcuid mhaith de na hiarrachtaí scórála sin. B’fhéidir nach réabhlóid theaicticiúil a fheicfear faoi McGuinness mar a chonacthas in 2011 ar aghaidh, ach is athrú ó bhonn atá le feiceáil i bhfoireann Dhún na nGall i gcomparáid le mar a bhí anuraidh.
Ryan McHugh. Ciarán Thompson. Jamie Brennan. Ag éisteacht le tráchtaireacht Chonall Uí Mháirtín inné, chuirfí an seanfhocal (bhuel, tvuít ó 2021) i gcuimhne duit: is féidir le fir díreach suí thart agus sean-imreoirí spóirt a ainmniú agus am ar dóigh a bheith acu. Ach ní sean-imreoirí iad seo – tá siad ar ais, tá siad ag teacht isteach i mbarr a maitheasa, agus i bhfianaise an mhéid a bhí le feiceáil Dé Domhnaigh, tá siad ag teacht le cíocras fíochmhar chun na rudaí nár ghnóthaigh siad le roinnt blianta anuas a bhaint amach faoi Jim McGuinness. Beidh seisean níos mó ná sásta an cíocras sin a chothú.
Is cosúil gur ag cothú na chéad ghlúine eile atá McGuinness chomh maith, le trí chúilín ghalánta Dé Domhnaigh ó Odhrán Doherty – imreoir óg snasta ar thaobh eile an scála ón triúr thuasluaite. Cuirfidh an rogha seo go mór le foireann a bhí ag brath an iomarca ar na hainmneacha céanna le blianta beaga anuas.
Le mórthaispeántas na gConallach in ainneoin na gcúinsí Dé Domhnaigh; Muineachán ag gnóthú bua gan choinne, más féidir sin a thabhairt air, faoi na soilse i bPáirc an Chrócaigh; agus na coimhlintí iontacha ar fad a bhí againn thar an deireadh seachtaine – an bhfuil muid i ndiaidh breith róthobann a dhéanamh agus muid ag fógairt bhás na peile Gaelaí?
Ag labhairt dó le Cahair O’Kane ón Irish News i dTrá Lí Dé Sathairn, léirigh seanfhondúir Dhoire Chrissy McKaigue gur sin an tuairim atá aige féin.
“Sílim go bhfuil an pheil maith go leor más féidir linn glacadh leis go bhfuil sí i ndiaidh athrú. Sílim go bhfuil táirge dochreidte againn. Briseann sé mo chroí go bhfuil an oiread sin diúltachais ina Leith,” a dúirt sé.
Alt eile ar fad a bheidh de dhíth le dul tríd an cheann sin. Don am i láthair, bainimis sult as an pheil – idir mhaith agus nach-bhfuil-chomh-maith – agus í ar ais linn sé mhí eile.
The post Tús leis an tsraith peile agus tús níos fearr arís ag na foirne Uladh appeared first on NÓS.
