Tá fógartha ag Príomh-Aire na Breataine Theresa May go bhfuil fúithi éirí as roimh an gcéad bhabhta idirbheartaíochta eile leis an AE faoin mBreatimeacht.
Dúirt May an méid sin le Coiste 22 na dTóraithe tráthnóna agus súil aici go gcabhróidh a fógra léi a margadh a chur thar abhainn.
Dúirt May gur “am crua” a bhí ann don tír agus dá páirtí ach go rabhthas ar tí tabhairt faoi “chaibidil nua” a bheadh níos fearr.
Dúirt sí nach dtaithíonn sí tithe ósta ná nach ngéilleann sí do ráflaí ach go raibh “teachtaireacht shoiléir” faighte aici faoi dhearcadh lucht a páirtí sa pharlaimint.
“Tá a fhios agam go bhfuil daoine ag iarraidh cur chuige nua, agus ceannaireacht de chineál nua, agus aghaidh á tabhairt ar an dara babhta den idirbheartaíocht faoin mBreatimeacht agus ní sheasfaidh mise roimhe sin,” arsa Theresa May le cúlbhinseoirí a páirtí tráthnóna.
Dúirt sí go gcaithfí an margadh Breatimeachta a chur tríd an bParlaimint agus imeacht as an Aontas Eorpach.
“Tá mé sásta an post seo a fhágáil níos túisce ná a bhí socraithe agam ar mhaithe le leas ár dtíre agus ár bpáirtí.”
“Iarraim ar an uile dhuine sa seomra seo tacú leis an margadh chun gur féidir linn ár ndulagas stairiúil a chomhlíonadh – is é sin beart a dhéanamh de réir bhriathar mhuintir na Breataine agus an tAontas Eorpach a fhágáil go réidh agus faoi dhea-eagar”.
Tá vótáil ar siúl ag feisirí parlaiminte in Westminster tráthnóna faoi shocruithe eile mar mhalairt ar mhargadh imeachta Theresa May.
Vótaí táscacha iad vótaí na hoíche anocht, is é sin vótaí a thugann tásc nó tuairisc ar mhianta na bhfeisirí i dtaobh an Bhreatimeachta.
Dúirt Príomh-Aire na Breataine agus a rialtas nach gá go nglacfaí le haon phlean a thiocfadh as na vótaí agus tá Theresa May meáite i gcónaí ar a plean féin a chur faoi bhráid na parlaiminte den tríú huair.
Beidh sí ag súil anois go gcuirfidh a fógra imeachta féin ar a suaimhneas faoina margadh cuid de na Breatimeachtóirí is diongbháilte sa pharlaimint, ina measc an DUP agus baill an ERG, an grúpa Tóraithe a bhfuil Jacob Rees-Mogg ina chathaoirleach air.
Dris chosáin eile roimh mhargadh May é dearbhú an Spéicéara John Bercow inniu nach ceadmhach an margadh imeachta a chur faoi bhráid na parlaiminte an tríú huair mura ndéanfaí leasú suntasach ar an rún a mbeifí ag vótáil ina thaobh.
Má éiríonn le May teacht timpeall ar rialú Bercow meastar go bhféadfadh vóta eile faoin margadh imeachta, ar diúltaíodh faoi dhó cheana dó, a bheith ann chomh luath leis an Aoine bheag seo.
