Comórtais Liteartha an Oireachtais agus imeachtaí baile eile
Sraith de chuid BLOC, ‘i gCoraintín’
Tá struchtúr an lae athraithe ó bhonn do scata againn le tamall anuas. I mo chás féin, téim a chodladh níos déanaí agus ní ithim lón ag an am céanna a thuilleadh. Tá mo chuid laethanta as riocht! Más duine tú a itheann lón ag 13.00 de ghnáth, bí ar an eolas faoi chomhráití atá eagraithe ag BLOC uair sa tseachtain ag an am sin! Labhrann Mícheál Ó Ciaraidh le haíonna éagsúla sa tsraith seo ar a bhfuiltear ag tabhairt ‘i gCoraintín’ air.
Le cúpla seachtain anuas bhí Chris Greene, Gavin Ó Fearraigh agus Cian, ó ‘Gaylgeoirí’ faoi agallamh. Is ar Instagram Live a tharlaíonn a leithéid. Cuirtear fógra mar gheall air in airde, cúpla lá roimh ré — bí ag faire dó! D’fhéadfá do lón féin a ithe i gcomhluadar breá.
An fhéile Cúirt ar líne
Is cuimhin liom go maith a bheith ag scríobh faoin bhféile litríochta Cúirt ar an leathanach seo le tamall de bhlianta. Níor cheapas gur amhlaidh a bheadh in 2020 áfach, i bhfianaise gach atá feicthe againn le cúpla seachtain anuas – ach ní mar a shíltear a bhítear is léir.
Tá an fhéile faoi lán seoil ar líne ó bhí inné ann agus leanfaidh na himeachtaí go dtí an lá amárach. I measc imeachtaí na hAoine, beidh comhrá le clos idir Elaine Feeney agus Lisa McInerney, aoi-eagarthóirí na hirise The Stinging Fly; agus beidh an scríbhneoir Anne Enright faoi agallamh ag Rick O’Shea níos déanaí sa tráthnóna. Tá lá eile imeachtaí beartaithe don Satharn, ina measc comhrá leis na scríbhneoirí Kevin Barry agus Jan Carson. B’fhiú súil a chaitheamh ar an suíomh atá acu, cuirt.ie
Comórtais Liteartha an Oireachtais
Tá sé ráite agam cheana agus déarfaidh mé arís é – seo an t-am le bheith cruthaitheach! Ainneoin go bhfuil éadóchas ar Liam Ó Maolaodha, stiúrthóir an Oireachtais faoi fhéile na bliana seo, tá iontrálacha fós á lorg dá gcomórtais liteartha. 23 comórtas ar fad atá sa chlár i mbliana, dírithe ar scríbhneoirí óga agus fásta. Tá duaischiste iontach acu, dóibh siúd a mbeidh an t-ádh leo! Seo an t-am, cuir peann le pár agus tabhair cuairt ar an leathanach idirlín seo
Ciorcail Comhrá de chuid Chonradh na Gaeilge
Ar scáth a chéile a mhairimid agus faoi láthair, ní ar chumas na héinne atá sé a bheith i measc a gcairde ná a muintire. Ar an mbonn sin, tá Ciorcail Comhrá Gaeilge eagraithe ag Conradh na Gaeilge chun daoine a nascadh le chéile. Seo deis do dhaoine ní hamháin daoine eile a fheiscint (ar scáileán), ach chun a gcuid Gaeilge a chleachtadh chomh maith. Is iad na grúpaí pobail agus na craobhacha timpeall na tíre atá á n-eagrú seo. Gheobhaidh tú gach eolas atá uait, ach teachtaireacht a sheoladh chuig caint@cnag.ie chun liosta na gcontaetha agus na gceantar a fheiscint.
Pop Up Gaeltacht, anocht @ 23:00, ar líne
Tá Pop Up Gaeltacht á heagrú ag dream an chuntais ‘Let’s Learn Irish’ anocht. Is ar líne atá a leithéid le bheith ar siúl, mar chuid d’Fhéile na Gaeilge atá ar bun acu le cúpla lá anuas. Is ag 23:00 am na hÉireann a bheidh sé ar tosú (18:00 ET). Craic, comhluadar agus ceol atá geallta, gach eolas ar an leathanach seo
