Tá trí chúrsa Gaeilge á reáchtáil ar líne ag Coláistí Chorca Dhuibhne i nGaeltacht Chiarraí an samhradh seo agus gnáthchúrsaí samhraidh na bliana seo curtha ar ceal de bharr na paindéime.
€150 an costas atá ar áit ar cheann de chúrsaí ‘An Ghaeltacht sa Bhaile’ atá á reáchtáil ar líne idir an 8 Meitheamh – 17 Iúil.
Beidh na cúrsaí dírithe ar thrí ghrúpa ar leith; daltaí bunscoile, daltaí atá ag gabháil don Teastas Sóisearach agus daltaí Ardteiste. I measc na n-imeachtaí siamsaíochta atá luaite ar an chlár, tá zúmba, ióga agus damhsa seit.
Ar an ardán Zoom a reáchtálfar na ranganna, a mhairfidh dhá uair an chloig sa lá.
Ag labhairt dó le Tuairisc.ie, dúirt Bainisteoir Chomharchumann Chorca Dhuibhne, Páidí Ó Sé, gur cuireadh dlús lena gcuid iarrachtaí cúrsaí Gaeilge a chur ar fáil ar líne le roinnt seachtainí agus amhras ann faoi na coláistí samhraidh a bheith ar siúl i mbliana.
“Bhí plean dhá bhliain againn cúrsaí a chur ar líne agus bhí deontas againn ón Údarás le trádáil ar líne agus leis an éiginnteacht a bhain leis na cúrsaí samhraidh i mbliana chuir sé brú orainn iad a eagrú.”
Dúirt Ó Sé go raibh éileamh ar áiteanna ar na cúrsaí ar líne.
“Tá éileamh ar na cúrsaí agus suim ag daoine blas a fháil den nGaeltacht. Tá paidreacha á rá againn go n-oibreoidh sé. Ní sinne an t-aon choláiste atá ag breathnú ar líne. Tá coláistí eile ag féachaint air seo leis agus is dócha go gcaithfidís smaoineamh ar phlean éigin le cúpla pingin a thabhairt isteach.
Is féidir áit a chur in áirithe ar chúrsa ar líne de chuid Choláistí Chorca Dhuibhne anseo.
