Zúmlann scríbhneoireachta le Dairena Ní Chinnéide agus imeachtaí baile eile
Oíche Thraidisiúnta Airneáil ar líne le Zoom
Más díomhaoin a bheidh tú tráthnóna, gach seans go mbeidh suim agat san imeacht seo atá eagraithe ag Meitheal Pleanála Teanga an Iarthuaiscirt! Tá Oíche Airneáil Ghaeltachta le bheith ar siúl acu via Zoom. Gealltar go mbeidh aíonna speisialta go leor i láthair, ceol agus craic chomh maith! Tá líon na rannpháirtithe teoranta, mar sin le bheith páirteach, bí cinnte d’ainm a sheoladh chuig mpt.iarthuaiscirt@gmail.com go luath. Cuirfear tús leis an spraoi @ 21:00 anocht.
Comórtas BLOC ar-líne
Táim ag iarraidh athchruthú a dhéanamh ar íomhá cáiliúil, le bheith san áireamh do chomórtas BLOC! Is breá liom an smaoineamh atá acu, agus iad ag iarraidh ar dhaoine a leagan féin de shaothar aitheanta ealaíne a roinnt leo, bunaithe ar an víreas corónach. Má tá inspioráid uait, nó tuiscint níos fearr ar an gcúram, téir chomh fada lena gcuid ardán chun iontrálacha atá fachta acu go dtí seo, a fheiscint. Tá dearbhán €100 don mbialann is fearr leat le buachan, le caitheamh nuair a bheidh deireadh leis na srianta atá curtha i bhfeidhm le tamall anuas. Tá agat go dtí an 26 Aibreán chun d’íomhá a sheoladh via teachtaireacht dhíreach chuig chuntas Instagram BLOC.
Zúmlann Scríbhneoireachta le Dairena Ní Chinnéide
An bhfuil fonn ort snas a chur ar do chuid scileanna scríbhneoireachta? Más ea, bí ar an eolas faoi chúrsa fíorúil sa scríbhneoireacht chruthaitheach, go gcuirfear tús leis an tseachtain seo chugainn. Is í Dairena Ní Chinnéide, an file agus scríbhneoir aitheanta ó Chorca Dhuibhne a bheidh ina bhun, agus mairfidh sé ar feadh sé seachtaine. Bainfear úsáid as Zoom chun na héinne a thabhairt le chéile ar feadh tuairim is uair an chloig go leith. Is dírithe orthu siúd atá ag cur fúthu i nGaeltacht na tíre atá na ceardlanna seo, agus is féidir clárú saor in aisce, ach teachtaireacht a sheoladh chuig: pobalrua@gmail.com
Club Leabhar Chonradh na Gaeilge
Club Leabhar Chonradh na Gaeilge
Tá go leor cainte mar gheall ar Zoom i láthair na huaire agus scata á húsáid le fanacht i dteagmháil lena chéile agus sinn ar fad ag fanacht glan ar a chéile! Is tríd Zoom atá lucht Chlub an Chonartha ag eagrú a gClub Leabhar Míosúil. Uair sa mhí beidh plé, cur agus cúiteamh ag na baill faoin saothar. Is é leabhar na míosa seo ná Dílis le Réaltán Ní Leannáin. Má tá fonn ort é a léamh agus a bheith páirteach, bí ar an eolas go mbeidh an chéad teacht le chéile eile ar siúl ar an 28 Aibreán. Bí i dteagmháil leo go díreach — runai@anclub.ie le bheith páirteach!
Comórtas scríbhneoireachta de chuid RTÉ Radio 1
Seo am na gcomórtas! Tá oiread feicthe agam ar líne le tamall anuas chun daoine a spreagadh le bheith cruthaitheach – agus is maith ann iad! Má fhreastalóidh tú ar cheardlanna Dhariena Ní Chinnéide, gach seans go mbeidh fonn ort iarratas a chur isteach do chomórtas gearrscéalaíochta Francis McManus. Tá duaiseanna maithe airgid le buachan, ina measc €3,000 don té a thiocfaidh sa chéad áit — cuimhnigh air! Craolfar é chomh maith ar RTÉ Radio One, agus foilseofar é ar thejournal.ie
Tá na sonraí ar fad le feiscint ar rte.ie/writing
