Féasta na Bealtaine agus imeachtaí eile baile
Ceardlanna raidió le Raidió Rí-Rá, ar-líne agus saor in aisce!
An raibh sé riamh sa cheann agat clár raidió a chur le chéile, ach nach raibh an tuiscint cheart agat ar an bpróiseas? Má sea, bí ar an eolas go bhfuil ceardlanna raidió ar líne á reáchtáil ag Raidió Rí-Rá, ina múinfear scileanna cumarsáide agus raidió. Is dírithe den gcuid is mó ar dhaltaí meánscoile atá na ceachtanna seo, ina mbeidh roinnt craic, gealltar! Níl aon chostas orthu, níl le déanamh ach teachtaireacht a sheoladh chuig lucht an stáisiúin eolas@rrr.ie
Comórtas curadóireachta Chonamara Láir
Tá go leor againn ag caitheamh go leor ama amuigh sa gharraí. Cuid againn ag sú na gréine, cuid eile i mbun aclaíochta agus cuid eile ag cur agus ag baint! Tá comórtas curadóireachta eagraithe ag an dream a thugann Conamara Láir orthu féin; baineann an grúpa seo leis an limistéar siar trí Ros Muc, Cill Chiaráin, Carna, An Caiseal agus chomh fada ó thuaidh leis an Sraith Salach. Tá suíomh ar-líne acu (conamaralair.ie) agus cuireann siad eolas áitiúil in airde mar gheall ar imeachtaí agus a leithéid.
Le bheith san áireamh don gcomórtas curadóireachta seo, tá siad ag súil go gcoimeádfaidh tú dialann Ghaeilge faoi dhul chun cinn do gharraí más ag cur glasraí nó prátaí atá tú i mbliana! Tá dearbhán do shiopa garraíodóireachta le buachan. Is féidir clárú ach teagmháil a dhéanamh le opt@conamaralair.ie
Féasta cheoil ar-líne, anocht, eagraithe ag Cultúrlann McAdam Ó Fiaich
Beidh Féasta na Bealtaine ar-líne, ar bun anocht! Deis do lucht féachana scoth an cheoil a chlos ó leithéidí Diane Cannon, Emma Ní Fhíoruisce, Gráinne Holland, mar aon le Zoe Conway agus John McIntyre. Níl ansin ach blaiseadh beag do na ceoltóirí a bheidh páirteach san imeacht seo a léireoidh eilimintí d’oidhreacht agus do chultúr na nGael. Is í Caoimhe Ní Chathail a bheidh á chur i láthair. Is féidir súil a chaitheamh ar an gcoirm ar leathanach YouTube nó Facebook Chultúrlann McAdam Ó Fiaich, an dream atá á heagrú. Cuirfear tús leis timpeall 20:30 agus más mian leat, is féidir leat síntiús a thabhairt dóibh ach an nasc PayPal seo a leanúint: paypal.me/culturlann
Borrow Box, Aip Leabharlainne
Más ball tú de do leabharlann áitiúil, ach nach bhfuil an deis agat dul chuige in am seo an ghátair, b’fhiú cur amach a bheith agat ar Borrow Box. Is aip atá ann a ligeann duit leabhair nó closleabhair a thógaint ar iasacht ó leabharlanna na tíre. Anuas air sin, is féidir leat aipeanna a mhúineann teangacha duit a aimsiú air, nuachtáin, irisí agus cúrsaí ar-líne!
Fiú mura bhfuil tú cláraithe le do leabharlann áitiúil, tá an deis agat cuntas a chruthú go héasca ach cuairt a thabhairt ar librariesireland.ie
