An turasóireacht áitiúil – moltaí do Chúige Uladh
Agus maolú ag teacht ar shrianta Covid-19, tá deis againn dul ag spaisteoireacht in ár gcontae féin anois! Seo roinnt moltaí d’áiseanna agus imeachtaí go dtig leat taitneamh a bhaint astu i do cheantar féin sna seachtainí agus míonna amach romhainn
1.Aontroim
Is áit ghalánta cois farraige é Baile an Chaistil i dtuaisceart Chontae Aontroma. Thig leat dul ag snámh san fharraige, ach faraor, is áit fhuar í! Bain sult as iasc agus sceallóga ó bhialann Morton’s ar an gcé agus bíodh uachtar reoite agat ó The Dessert Bar ina dhiaidh. Is turas beag é go droichead Charraig a’ Ráid freisin, áit go dtig leat dul ag siúl agus sult a bhaint as an radharc álainn.
2. Ard Mhacha
Is fiú dul ag siúl ar Shliabh gCuillinn, atá i gcroílár Fáinne Cnoc Shliabh gCuillinn, i ndeisceart an chontae. Tá páirc foraoise álainn le conair shiúil, páirc súgartha agus caifé sa cheantar freisin.
3. An Cabhán
Téigh ag spaisteoireacht i bpáirc foraoise Choillidh Chaoin. Thig leat picnic a thabhairt leat agus taitneamh a bhaint as faoi na crainn. Tá an páirc suite ar Loch Thulaigh na Neá, agus thig leat leas a bhaint as conairí éagsúla siúil agus tú ann.
4. Doire
Bíodh bricfeasta deas agat sa Pickled Duck Café má tá tú i mbaile Dhoire. Téigh ó dheas le Sléibhte Speirín a dhreapadh, atá 678 méadar ar ard, agus a nascann Doire le Contae Thír Eoghain.
5. Dún na nGall
Tabhair cuairt ar thrá Chnoc an Mharmair le rang surfála a dhéanamh i scoil surfála ‘Narosa’. Bain taitneamh as uachtar reoite nó cupán caife ó The Shack, atá lonnaithe ar an trá. Thig leat turas beag a dhéanamh chuig baile in aice láimhe, Dún Fionnachaidh agus na siopaí agus bialanna éagsúla atá ann a aimsiú.
6. An Dún
Caithfidh tú cuairt a thabhairt ar Chaisleán an Bharda, atá lonnaithe garr do bhaile Loch Cuan, más leantóir de Game of Thrones thú. Tá an caisleán álainn seo le feiceáil sa tsraith cáiliúil teilifíse. Déan an turas gearr go Loch Cuan agus bain taitneamh as imeachtaí éagsúla inhIonad Eachtraíochta Clearsky.
7. Fear Manach
Dreap Cnoc Binn Chuilceach, a bhfuil cáil air mar ‘staighre chuig na flaithis’ na tíre seo. Tiomáin go hInis Ceithleann, áit go dtig leat ‘Erne Water Taxi’ a ghlacadh, le taitneamh a bhaint as áilleacht agus suaimhneas Loch Éirne.
8. Muineachán
Bíodh siúlóid agat thart ar Loch Mhucnú. Bí cinnte go ndéanann tú bealach siúil an Oileáin Dhuibh, atá dhá chiliméadar ar fhad. Tá páirc súgartha Wilbert lonnaithe anseo freisin, áit go dtig leat úsáid a bhaint as ziplíne!
9. Tír Eoghain
Tabhair cuairt ar Ghleann Ghoirtín, áit le siúlbhealaí agus bealaí rothaíochta san Ómaigh. Tabhair bosca picnic leat ó The Kitchen i mbaile Ómaigh agus bain taitneamh as sa pháirc foraoise.
