Ní raibh bás ar bith le fógairt ag an Roinn Sláinte ó dheas tráthnóna.
11 cás nua den ghalar a deimhníodh.
Dúirt an Príomh-Oifigeach Leighis gníomhach, an Dr Ronan Glynn, tráthnóna nach “tráth réchúise a bhí ann” agus go raibh sé róluath a bheith ag caint faoin ngalar “a dhíothú”. Caithfear an galar a chur “faoi chois” ar dtús, a dúirt sé. Dúirt sé go ndealraíonn sé go bhfuil ráta scaipthe an ghalair, an uimhir R, fós os cionn 1.
Dúirt an Dr Ronan Glynn, áfach, go raibh cúrsaí níos seasmhaí ná mar a bhí agus údar dóchais ann dá réir.
“Ar an dea-uair, tá líon na gcásanna a tuairiscíodh an tseachtain seo (124) níos lú ná líon na gcásanna a tuairiscíodh an tseachtain roimhe seo (143).
“Léiríonn seo an chumhacht a bhaineann le gníomh an duine aonair cúrsa an Covid-19 a athrú inár dtír. Sinn féin an chosaint is fearr ag againn dá chéile. Tá a fhios againn cad a oibríonn – is féidir linn ar fad ár gcuid a dhéanamh chun scaipeadh an víris seo a chosc ach seasamh le chéile, a bheith san airdeall i gcónaí agus cloí leis na treoracha sláinte phoiblí.”
De réir na bhfigiúirí is déanaí, 196 cás nua den ghalar a deimhníodh le coicís anuas. Bhain 9% de na cásanna sin le cúrsaí taistil.
Fuair 34% de na daoine a bhí i gceist an galar ó ghartheagmhálaí agus bhain 32% de na cásanna le scaipeadh sa phobal. 37 an aois mheánach a bhí ann i measc an 196 cás agus bhí 58% de na daoine idir 25-55 bliain d’aois.
De réir na bhfigiúirí is déanaí, tá an galar ar 4.12 duine in aghaidh gach 100,000.
10 n-othar a bhfuil Covid-19 orthu atá sna hospidéil agus tá seisear acusan sna haonaid dianchúraim.
Ní raibh aon bhás de bharr an víris le fógairt inniu ag Roinn Sláinte an Tuaiscirt ach oiread, ach deimhníodh 21 cás nua den ghalar ag an deireadh seachtaine.
36 cás nua den choróinvíreas a fógraíodh ó dheas le linn an deireadh seachtaine, 24 ceann Dé Sathairn agus 112 cás Dé Domhnaigh.
2,320 duine ar a laghad atá básaithe in Éirinn ó thús na paindéime, 1,764 duine ó dheas den teorainn agus 556 ó thuaidh di.
31,804 cás den ghalar Covid-19 atá deimhnithe go dtí seo in Éirinn, 25,892 cás ó dheas den teorainn agus 5,912 cás ó thuaidh di.
Níor fógraíodh aon athrú inniu ar líon na gcásanna Covid-19 i nGaillimh (493), i nDún na nGall (472), i gCiarraí (317), i bPort Láirge (166), i gCorcaigh (1,562) ná i gcontae na Mí (826).
De réir na bhfigiúirí is déanaí, bhí cás nua amháin i Maigh Eo (576).
