Cé go bhfuil Enda Kenny á lua faoi láthair leis an phost a bhíodh ag Phil Hogan sa Choimisiún Eorpach, tá jab nua faighte cheana féin ag an iarThaoiseach agus sraith úr Ghaeilge á cur i láthair aige do RTÉ.
Sraith faisnéise faoi na seanbhealaí iarnróid a bheidh á cur i láthair ag Enda Kenny agus tá an tsraith le craoladh ar RTÉ 1 roimh dheireadh na bliana seo nó ag tús na bliana seo chugainn.
An comhlacht teilifíse Feirsteach Sonas Productions, a bhfuil go leor cláracha Gaeilge déanta acu do TG4 agus BBC Gaeilge, atá i mbun an léirithe.
Tuigtear do Tuairisc.ie go bhfuil trí chlár den tsraith sé chlár taifeadta go dtí seo agus go bhfuil an tiar-Thaoiseach, arb as Caisleán an Bharraigh dó, ag baint an-taitneamh as aithne a chur ar na bealaí iarnróid a bhí ann fadó.
Ní hé Enda Kenny an t-aon phearsa mór le rá a bheas le feiceáil ar chláracha nua Gaeilge RTÉ, agus sraith eile beartaithe ag an chraoltóir náisiúnta a thabharfaidh daoine iomráiteacha chun na Gaeltachta le Gaeilge a fhoghlaim.
Ní fios fós cén uair a bheidh Réalta na Gaeltachta, ag tabhairt aghaidh ar an Ghaeltacht mar gheall ar na deacrachtaí agus na srianta a bhaineann le Covid-19.
