Ceithre shiopa le dul ag múitseáil thart iontu (ar líne)
Ní bhíodh suim mhór agamsa riamh a bheith ag siopadóireacht ar líne. B’fhearr liom i bhfad a dhul ó shiopa go siopa, ag breathnú ar rudaí anseo agus ansiúd. I mbliana ní raibh sé de rogha agam ach dul ag siopadóireacht ar líne agus, bhuel, is scéal eile anois é. Le seachtain anuas, bím ar bís nuair a thagann fear an phosta le bronntanais an lae (ní dom féin uilig é, geallaim duit).
Mar sin féin, feictear dom go mbíonn sé deacair cos a choinneáil leis an tsiopadóireacht ar líne seo ar fad, go háirithe má tá tú ag iarraidh a bheith ag ceannacht ó shiopaí Éireannacha, Gaelacha. Is é an bealach is fearr lena dhéanamh, dar liom féin, ná dul ar shuíomh amháin agus a fheiceáil go díreach céard atá acu, seachas a bheith ag dul ó shiopa go siopa agus fiche míle cluaisín oscailte agat.
Seo a leanas cúig shiopa ar líne go mb’fhéidir nach bhfuil feicthe cheana agat agus go mb’fhiú go mór breathnú ar chuile rud beo atá acu, mar is cinnte go dtiocfadh tú ar rudaí nach raibh súil ar bith agat leo. B’fhearr a bheith á gceannacht go luath mar ní fada uainn an Nollaig agus níor mhaith liom go mbeadh duine ar bith díomách ar an lá mór!
De Búrca
Tá réimse breá de phriondaí, málaí agus oscailteoirí buidéil ar fáil ar an suíomh seo, chomh maith le go leor rudaí eile, agus iad uilig deartha ag Orlaith de Búrca. Seasann a cuid ealaíne amach leis na dathanna bríomhara a úsáideann sí, agus tá rud éign thar a bheith cool fúthú uilig.
(Agus má tá rud éigin níos pearsanta uait, déanann sí rudaí pearsantaithe freisin). Céard eile a bheadh uait?
Hairy Baby
Suíomh é seo le héadach do chuile chineál duine. Deartha le greann, tá réimse bréa leathan éadaí ann do chuile aoisghrúpa (caith súil ar na mascanna aghaidhe atá acu) agus roinnt mhaith acu i nGaeilge freisin! Tá muigíní deas acu, agus bíonn easpa muigíní i gcónaí sa teach s’againne…
Mireog
Is cinnte gur airigh sibh uilig caint ar Mhíreog cheana féin, ach ní fhéadfainn liosta na Nollag a scríobh gan iad a luaigh. Obair ealaíne i ndáiríre atá in earraí de chuid na comhlachta seo, ina bhfuil chuile shaghas rud a bheadh uait ar fáil ann. Tádar théis teacht amach le cártaí áille le réinfhianna orthu don Nollaig, agus is cinnte go bhfuil an-tóir ag daoine ar chártaí Nollag i mbliana.
Sock Co-op
Breathnaigh, ní bheidh dóthain stocaí riamh ag duine agus i ndáirire, ní Nollaig ar bith é muna bhfaigheann tú ar a a laghad péire amháin stocaí faoin gcrann Nollag. Tá stocaí áille ag Sockcoop a choinneodh do chosa breá teolaí agus pictiúirí de thírdhreach na hÉireann ar na boinn agat. Níl réimse mór millteach rudaí acu, ach ciallaíonn sé sin go mbeidh níos éasca ortsa chuile shórt a fheiceáil!
