Tá “alltacht agus uafás” ar dhaoine i gCois Fharraige faoi phlean Chomhairle Chontae na Gaillimhe maidir le tuirbíní gaoithe á thógáil sa cheantar.
Deir Coiste um Zónáil Tuirbíní Gaoithe Chois Fharraige go bhfuil “go leor” daoine sa cheantar in aghaidh pleananna atá leagtha amach i ndréachtphlean forbartha nua an Chontae chun foinsí in-athnuaite fuinnimh a fhorbairt sa cheantar.
Is cúis imní é don choiste, a bhfuil ionadaithe ó choistí áitiúla éagsúla páirteach ann, an méadú suntasach atá tagtha ar líon na limistéar i gceantar Cois Fharraige atá aitheanta ag an Chomhairle mar áiteanna ina bhféadfaí tuirbíní gaoithe a thógáil.
Dhá limistéar atá aitheanta ag an Chomhairle i bPlean Forbartha an Chontae 2015- 2021 mar áiteanna a bheadh ‘feiliúnach’ le haghaidh tuirbíní gaoithe i gceantar Cois Fharraige agus tá 23 limistéar aitheanta i nDréachtphlean Forbartha an Chontae 2022-2028.
Tá iarrtha ag an Choiste um Zónáil Tuirbíní Gaoithe Chois Fharraige ar Chomhairle Chontae na Gaillimhe go gcuirfí siar an spriocdháta atá socraithe d’aighneachtaí faoin cheist. Amárach, Dé hAoine an 30 Iúil, an spriocdháta faoi láthair.
Iarrtar chomh maith go gcuirfí ar athlá cur i bhfeidhm Phlean Forbartha Chontae na Gaillimhe 2022-2028 ar feadh bliana le go mbeidh deis ag an bpobal ceist na dtuirbíní gaoithe i gCois Fharraige a phlé i gceart.
Deirtear i litir a sheol an coiste chuig comhairleoirí, Teachtaí Dála agus na meáin chun aird a tharraingt ar a bhfeachtas go bhfuil “i bhfad Éireann” níos mó tuirbíní gaoithe i gConamara Theas i gcomparáid leis an chuid eile den chontae.
Deirtear chomh maith go bhfuil cuid de na limistéir atá aitheanta ag an Chomhairle mar áiteanna a bheadh feiliúnach do thuirbíní gaoithe “i bhfad róghar” do thithe cónaithe.
Laghdú ar luach na dtithe, bánú na Gaeltachta, fadhbanna sláinte agus an “drochéifeacht” a bheadh ag a leithéid de phlean ar chur chun cinn na Gaeilge sa cheantar atá i measc na n-ábhar buairimh eile atá ag an choiste.
Maíonn lucht an choiste chomh maith nár reáchtáladh próiseas comhairliúcháin ceart ina bhféadfadh muintir Chois Fharraige a gcuid tuairimí a chur in iúl mar gheall ar an phaindéim.
“Tháinig beartas nua seo na Comhairle aniar aduaidh ar mhuintir Chois Fharraige. Is i lár paindéime, le hais am ar bith, a tharla sé seo nuair nárbh fhéidir linne cruinnithe poiblí a eagrú le beartas na Comhairle a phlé go poiblí,” a deirtear sa litir.
