Tá 185 iarrthóir ag dul san iomaíocht seachtain ón Mháirt seo chugainn i dtoghcháin lár téarma na Stát Aontaithe a chreideann nár bhuaigh Joe Biden toghchán na huachtaránachta in 2020.
Tá tacaíocht acu ó Donald Trump agus is cosúil go dtoghfar go leor acu. Cá bhfágfaidh sin an córas polaitiúil i Stáit Aontaithe Mheiriceá? Tá rud amháin cinnte – ciallaíonn sé nach bhfuil deireadh ná baol air le Trump agus go leanfar den fheachtas le toradh thoghchán 2020 a chur ar neamhní.
Sampla de na daoine seo is ea Anna Paulina Luna atá san iomaíocht don chomhdháil in Florida. Tá sé ráite cúpla babhta aici go gcreideann sí gur bhuaigh Trump an toghchán in 2020 agus go raibh caimiléireacht ar siúl. Tá chuile chosúlacht ann go dtoghfar ise ar an 8 Samhain.
Tá go leor eile mar í. De na hiarrthóirí ó Theach na nIonadaithe a cheistíonn toradh an toghcháin in 2020, léiríonn pobalbhreitheanna go bhfuil 70% acu san iomaíocht i gceantair atá dílis do Phoblachtánaigh agus dá réir, cinnte go maith go dtoghfar iad.
Níl an rath céanna ar iarrthóirí a mhaíonn go raibh an toradh mícheart ar thoghchán an tSeanaid agus na ngobharnóirí. Níl ach beirt den seachtar atá san iomaíocht ag seasamh i Stáit Phoblachtacha. Den ochtar atá ag seasamh don Seanad níl ach triúr – in Alabama, i Missouri agus in Oklahoma a bhfuil seans láidir ann go dtoghfar iad
Tá na huimhreacha i dtithe na Comhdhála chomh teann agus go gcomhaireann chuile vóta beo. Tá os cionn milliún caite cheana féin ag daoine agus cá bhfios céard a tharlóidh as seo go ceann deich lá le cor eile a chur sa scéal.
Tá an chuma ar an scéal sna laethanta atá fágtha go ndíreofar ar stáit ar leith ar nós Georgia agus Pennsylvania mar gheall ar a laghad atá idir an dá pháirtí go náisiúnta.
Idir an dá linn níl mórán ar bith cainte á dhéanamh faoin líon daoine atá ag seasamh sa toghchán a bhfuil sé ráite go hoscailte acu nach gcreideann siad san Uachtarán reatha ná ina réimeas. Tagann an chaint atá déanta ag a bhformhór le sainmhíniú an fhoclóra ar ainriail! Agus tá Donald Trump sa chúlra i gcónaí ag faire. Beag beann ar chásanna cúirte tá tuairimíocht go rachaidh sé san iomaíocht don Uachtaránacht in 2024.
Do Joe Biden agus a rialtas is measa an scéal. Dá dhonacht dá bhfuil cúrsaí anois ó thaobh riaradh na Comhdhála agus cur i bhfeidhm reachtaíochta, ní bheidh seans ar bith ann má thoghtar Seanadóir no dhó breise ar son an pháirtí Phoblachtaigh.
Má thacaíonn na Seanadóirí breise sin le seasamh Donald Trump nach bhfuil aon bhunús Daonlathach le toghadh Joe Biden is deacair a rá cén riocht ina mbeidh polaitíocht na Stát Aontaithe sna míonna agus na blianta seo romhainn.
