‘Mo mhála lán suibhe agus mo chloigeann lán cuimhní deasa tar éis Fhéile na bPuiteachaí’

“An lá a théanns tú ann, beir leat do chuid aráin, nó beidh tú an lá sin i do throscadh’, a dúirt Colm de Bhailís faoi Inis Meáin tráth dá raibh ach is beag duine a bhí ag Féile na bPuiteachaí i Halla Naomh Eoin Dé Sathairn seo caite a bheadh ar aon fhocal leis an bhfile Conamaraíoch. 

Chaith muid lá aoibhinn ag ceiliúradh na sméar dubh agus, mar a dúirt John Beag, “togha beatha á roinnt ag mná óga” ann.  Aedín Ní Thiarnaigh an tí seo a chum an fhéile agus a d’oibrigh go dian díograiseach leis an gcoiste áitiúil le Féile na bPuiteachaí a thabhairt ar an saol. 

Cuireadh tús leis an bhféile i Halla Naomh Eoin ar maidin agus bronnadh na duaiseanna do na comórtais filíochta. Ní raibh ach aon choinníoll amháin ann sa gcomórtas – chaithfí na puiteachaí a lua! Bhronn Máirín Mhéiní na duaiseanna móra ar Aonghus Ó Curraoin i rannóg na bunscoile (Naíonáin go Rang a 2), Michelle Ní Fhátharta i rannóg na bunscoile (Rang a 3 go Rang a 6), agus ar Fhearghas Mac Lochlainn i rannóg na ndaoine fásta dá amhrán ‘Amhrán na bPuiteachaí’. 

Amach linn i ndiaidh an bhronnta ar na creaga le hAedín féin, a bhfuil cáil amuigh mar bhean bláthanna, ar shiúlóid biaphlandaí. Labhair Aedín faoi na ‘puiteachaí’, na hairní, agus an t-iliomad plandaí eile a fhásann san oileán agus a thugann beatha don duine daonna. Bailíodh slam puiteachaí agus tugadh ar ais chuig Halla Naomh Eoin iad le haghaidh na gceardlann a bhí le tarlú amach sa lá. 

Ar na gasúir is mó a bhí an cheardlann péintéireachta agus déanta suibhe dírithe agus thapaigh mé an deis cuairt a thabhairt ar na Harry Clarkes i Séipéal Muire Gan Smál agus ar Dhún Chonchúir a fhad is a bhí na daoine óga ag caitheamh sú puiteachaí ar a chéile i gcisteanach an halla. Cé gur mhaith ann iad imeachtaí speisialta do na gasúir, tá mé a cheapadh go dtaitneodh an cheardlann déanta suibhe le daoine fásta freisin dá bhféadfaí é a dhéanamh an bhliain seo chugainn. 

Ar ais linn chuig an halla sa tráthnóna le haghaidh na ceardlainne déanta fíona – nó ‘jin’ mar a thugtar anois ar an deoch sna foclóirí. Ba é Pádraig Ó Fátharta a mhúin an cheird dúinn agus níorbh aon bhac í an Ghaeilge ar na rannpháirtithe idirnáisiúnta a bhí i láthair – duine amháin acu a tháinig an bealach ar fad as Florida go hInis Meáin.  

An imeacht dheiridh ar chlár na féile ná an choirm mhór cheoil le hÚna Ní Fhlannagáin, cláirseoir atá ina cónaí san oileán le tamall de bhlianta anuas. Chuaigh Úna sa tóir ar amhráin agus ar fhoinn a bhain le sméara dubha ar bhealach éigin, agus thug taispeántas álainn ceolmhar uaithi. Bhí tuilleadh ceoil agus amhráin ann ag lucht na féile agus muintir an oileáin sa teach ósta go deireanach san oíche. 

Agus mé ar an mbád ar ais go Ros an Mhíl an mhaidin dar gcionn, bhí an mála lán fíona agus suibhe agus an cloigeann lán cuimhní deasa d’Inis Meáin agus d’Fhéile na bPuiteachaí. Bígí ann an bhliain seo chugainn!

Níos mó