Sé mholadh do ‘Leabhra Feabhra’
Mí Feabhra is ea é, tosach an earraigh agus nach iontach an t-am é rudaí nua a thosnú. An lá ag dul chun síneadh agus rúin ró-uaillmhianacha na hathbhliana caite uait, am dóchasach is ea é seo gan dabht. Is é mí Feabhra mí léitheoireacht na nGael, is léir, agus an feachtas ‘Leabhra Feabhra’ fé lántseol. Moltar leabhair Ghaelainnne a thabhairt mar bhronntanais an mhí seo agus iad a léamh, gan dabht.
Más cosúil liomsa atá tú, bíonn tú de shíor sa tóir ar leabhair mhaithe agus tá liosta beag curtha le chéile agam, idir shean agus nua, de leabhair a thaitin go mór liom le tamaillín anuas.
Ag Scaoileadh Sceoil Seosamh Ó Duibhginn [An Clóchomhar/Cló Iar–Chonnacht, €30]
Cuimhní cinn an údair, a bhí i bpríosúin sa Churrach agus ina dhiaidh ina scríbhneoir Gaelainne agus ina eagarthóir ar iris Feasta sna laethanta luatha, atá sa leabhar seo. Foilsíodh in 1962 é, agus mar sin bhíos saghas amhrasach mar gheall ar an dteanga a bheadh ann ar dtús, ach leabhairín ana-spéisiúil is ea é óna bhfaightear léargas iontach ar a dheacra is a bhí sé a bheith id’ scríbhneoir Gaelainne ag an am. Fear a lean a phaisean ab ea é Ó Duibhginn, agus léirítear é seo don léitheoir trí na scéalta greannmhaire a insíonn sé ar a shaol. Leabhar deas gairid is ea é seo agus níl an Ghaelainn casta ach oiread. Cheapas go mb’fhéidir ná raibh an leabhar seo i gcló a thuilleadh, ach is féidir teacht air fós ar líne agus i leabharlanna, seans.
Lilí Frainc Maidhc Dainín Ó Sé [Cló Litríocht, €5.78]
Leabhar a phiocas aníos sa tigh lá amháin ab ea é seo, agus nach sásta a bhíos gur phiocas é! Ó thosach an leabhair bhí an scéal tarraingteach agus é inste i slí iontach, mar a bheifeá ag súil ón údar seo. Básanna, ionsaithe gnéis, imirce agus díoltas. Scéal iontach a gcuirfidh a chríoch ag cuimhneamh tú. An t-aon rud nár thaitin liom fén leabhar seo ná ná fuil aon chaibidil ann. Is maith liom leabhar a dhúnadh ag deireadh caibidle agus é a oscailt aríst ag tosach caibidil nua. Ach gearán suarach is ea é sin! Tá an leabhar seo as cló ach tá teacht ar fós i leabharlanna agus ar líne mar ríomhleabhar. Is fiú é!
Snámh na Saoirse Róisín Sheehy [LeabhairCOMHAR, €8.50]
“Athinsint shamailteach fhileata” ar bhá Dhomhnall Uí Chriomthain agus Eibhlín Nic Niocaill is ea an dráma gairid seo. Taitneoidh sé le duine ar maith leo drámaí a léamh agus ar maith leo fíorscéalta tragóideacha a léamh amhail is gur scéalta iad. Gan dabht is fearr dráma a fheiscint ar stáitse agus tá súil agam go gcífead an ceann seo ar an ardán go luath.
Éalú Áine Uí Fhoghlú [Cló Iar-Chonnacht, €8]
Ceann tráthúil is ea an leabhar seo a bhaineann leis an bhforéigean baile ach a bhfuil casadh dainséarach agus mistéir sa scéal leis. D’oirfeadh an leabhar seo d’aon léitheoir ach mholfainn go háirithe é don bhfoghlaimeoir fásta, toisc gur leabhar gairid é agus é roinnte ina chaibidlí. Cé gur scéal spéisiúil, tarraingteach é ná teastóidh uait é a chur síos, tá sé breá éasca é a léamh chomh maith.
Na Ríthe Beaga Delphine de Vigan/Máirín Nic Con Iomaire [Barzaz, €8]
Bhí rudaí iontacha cloiste agam fén gceann seo agus tar éis dom an t-aistritheoir a chlos ag léamh blúirín beag dó agus í ag labhairt fén cur chuige aistriúcháin a bhí aici, bhí orm é a fháilt go práinneach. Scéal tarraingteach agus ana spéisiúil is ea é seo, a choimeádann aird an léitheora agus a chuireann ag cuimhneamh duine ar an méid eolais a roinnimid ar na meáin gach aon lá dár saol. Gaelainn bhreá nádúrtha, atá sa leabhar seo agus cé gur ós cionn 300 leathanach é, níor thóg sé i bhfad ormsa é a chríochnú!
Bígí ag léamh libh!
