Céim ollmhór chun cinn do Rugbaí na mBan an fhoireann nua faoi 20
Fógraíodh le déanaí go mbeidh foireann ban faoi 20 bliain á seoladh an mhí seo chugainn. Beidh siad ag taisteal go dtí an Iodáil chun aghaidh a thabhairt ar an tír óstach agus Albain i roinnt cluichí traenála. Forbairt shuntasach agus spreagúil eile is ea seoladh an chláir do Mhná Faoi 20 bliain agus is céim thábhachtach í a bhí ag teastáil le fada.
Roghnaíodh 44 imreoir don scagadh cheana féin agus rachaidh 26 go dtí an Iodáil tar éis seachtain a chaitheamh ag Ionad Ardfheidhmíochta Cumann Rugbaí na hÉireann ag fáil réidh don turas. Ar an turas, traenálfaidh an fhoireann in aghaidh an dhá thír eile sula n-imreoidh siad dhá chluiche 40 nóiméad ina gcoinne, a dtabharfaidh am cluiche luachmhar in aghaidh freasúra idirnáisiúnta ar an leibhéal céanna dóibh.
Mar a luaigh mé cheana féin, is céim ollmhór í seo do rugbaí na mban mar ní raibh an deis seo ag imreoirí go dtí seo ag an leibhéal idirnáisiúnta. Thosaigh Sadhbh McGrath mar phrapa i mbliana i gCraobh na Sé Náisiún gan í a bheith ach 18 mbliana d’aois. Ní ceart go dtarlóidh sé sin ag prapa agus níl seans ar bith go dtarlódh sé i bhfoireann fear riamh. Ba d’Éirinn an chéad chluiche sinsearach rugbaí riamh a bhí ag Beibhinn Parsons, ní don chlub nó don chúige. Cinnte, rinne sí go maith agus lean sí uirthi ag déanamh go maith ag an leibhéal idirnáisiúnta (is dóigh gurb í an t-imreoir ban is aitheanta in Éirinn faoi láthair) ach ní mar sin a théann sé do gach imreoir.
Tá Corn Domhanda bhFear faoi 20 ar siúl faoi láthair agus ní gá duit ach roinnt ainmneacha a léamh chun comparáid a dhéanamh leis an gcóras (nó an easpa córais ba cheart dom rá) a bhí ag na mná. Tá Sam Prendergast ag imirt dóibh, déagóir le 10 caipín d’Éirinn faoi 20 bliain. Tá dhá chluiche proifisiúnta imeartha aige do Laighin freisin. Tá Ruadhán Quinn ag imirt freisin, déagóir a bhfuil sé chaipín d’Éirinn faoi 20 aige. Tá trí chluiche proifisiúnta imeartha aige don Mhumhain freisin. Agus ainmníodh an bheirt acu chun aghaidh a thabhairt ar an Astráil freisin.
Seo an cineál comórtais a theastaíonn ó imreoirí óga. Deis imirt in aghaidh imreoirí óga eile in áit iad a chaitheamh isteach ag an leibhéal is deacra gan mórán taithí acu ag an leibhéal sinsearach. D’imir na leithéidí Prendergast agus Quinn in aghaidh na Breataine Bige, an Fhrainc, Sasana, agus go luath, an Astráil ag an leibhéal faoi 20. Nach mbeadh sé iontach dá mbeadh an deis chéanna ag imreoirí rugbaí na mban?
Teastaíonn asraon mar seo d’imreoirí óga chun ligean dóibh forbairt ar a luas féin. Tá súil agam go bhfeicfidh muid comórtais ar nós Craobh na Sé Náisiún d’imreoirí ban faoi 20 ag tarlú go luath amach anseo.
