An tuar is déanaí ó lucht na haimsire go seasfaidh an brothall seo an chuid eile den tseachtain agus gur deireadh seachtaine gréine eile a bheidh againn.
Triomach atá á ghealladh go dtí oíche Dé hAoine nuair atáthar ag súil le múraíl bháistí chugainn ón taobh ó dheas den tír.
Beidh sé tirim grianmhar inniu agus an teocht is airde idir 19 agus 25 céim Celsius sa gcuid is mó den tír. Mar a bhí le scaitheamh, beidh sé níos fionnuaire sa taobh thoir den tír a bhuíochas don leoithne éadrom nó measartha anoir a fhágfaidh an teocht thoir idir 15 agus 18 céim.
Beidh sé tirim anocht, an spéir glan agus an teocht is ísle idir 9 agus 12 céim agus gaoth shéimh anoir.
Lá tirim gréine eile a bheidh againn amárach cé go bhféadfadh ceo brothaill a bheith ann scaití. Beidh an teocht is airde thart ar 16 céim san oirthear ach níos teo agus tú ag teannadh anoir mar a bhfuil suas go 24 céim á ghealladh leis an gcósta thiar.
Oíche thirim atá á tuar Déardaoin agus spéir ghlan den chuid is mó. Éireoidh sé níos scamallaí scaití agus d’fhéadfadh corr-ráig ceathanna a bheith san iardheisceart. Beidh an teocht is airde idir 17 agus 25 céim Celsius agus mar a bhí le coicís san iarthar is teo a bheidh sé agus anoir a bheidh an ghaoth mheasartha.
Oíche thirim den chuid is mó atá a tuar don Aoine freisin ach éireoidh sé scamallach sa taobh ó dheas agus san iardheisceart agus tá báisteach is ceathanna á dtuar ansin amach san oíche. Beidh an teocht is ísle idir 10 agus 15 céim agus gaoth mheasartha anoir ann.
Meastar go scaipfidh na néalta agus na ráigeanna báistí ó thuaidh faoin tír ar an Satharn ach beidh sé meirbh. Táthar ag tuar go mbeidh an teocht is airde idir 17 agus 22 céim agus gaoth mheasartha anoir nó anoir aneas chugainn.
Teas agus corrmhúr atá á ghealladh dúinn ón Satharn agus an teocht sna fichidí beaga.
Tá Sábháilteacht Uisce na hÉireann ag iarraidh ar dhaoine a bheith cúramach sa mbrothall agus iad in aice le huisce nó ag gabháil ag snámh. Iarrann siad ar shnámhaithe duine eile a bheith ina dteannta agus ceist a chur ar dhuine as an áit faoi aon sruth nó contúirt cheilte. Ba cheart cloí le comhairle is treoir an gharda tarrthála agus níor chóir snámh in uisce atá níos doimhne ná d’airde fhéin.
Tá Uisce Éireann ag impí ar dhaoine a bheith spárálach leis an uisce nuair is féidir mar go bhfuil an leibhéal íseal sna taiscumair in go leor ceantar agus ciondáil á déanamh air agus an t-uisce stoptha i rith na hoíche i roinnt mhaith áiteanna ar fud na tíre.
Mura dtagann aon bháisteach roimh dheireadh na seachtaine tá lucht feilméarachta ag tuar gur triomach talmhaíochta a bheidh againn agus teocht na cré dhá chéim os cionn an mheáin. Deir Met Éireann go bhfuil idir 60 agus 65mm d’easnamh fliuchrais sa gcréafóg san oirdheisceart faoi láthair rud a fhágann go mbeidh an barr gortach. “NÍor thit braon báistí i gcuid mhór den tír le seacht lá agus níor cláraíodh ach 0.33mm fliuchrais ag stáisiún aimsire Chionn Mhálanna,” a deir Siobhán Ryan ó Met Éireann. Is cinnte go mbeidh feilméaraí na tíre ag iarraidh braon báistí.
