‘Beidh dúshlán roimh Phort Láirge ach lá iontach camógaíochta romhainne Dé Sathairn’
Beidh Port Láirge ag tabhairt aghaidh ar Thiobraid Árann Dé Sathairn ag 15.30 i gCluiche Leathcheannais na hÉireann i bPáirc Uí Nualláin UPMC. Shroich siad an áit chéanna anuraidh den chéad uair ó 1959 sa chraobh shinsir. Ba iad Tiobraid Árann iad féin a bhuaigh an cluiche ceathrú ceannais ar Phort Láirge in 2021 agus a shéan a n-áit sa chluiche leathcheannais orthu.
An uair dheireanach a bhuaigh Port Láirge Craobh na hÉireann, sa chomórtas idirmhéanach, bhí cúigear imreoirí reatha ag imirt: Iona Heffernan, Lorraine Bray, Beth Carton, Niamh Rockett agus Vikki Falconer a bhuaigh an tsraith Roinn 2 sa bhliain chéanna.
Chaill Port Láirge an cluiche leathcheannais anuraidh i gcoinne Chorcaí agus is léir gur spreagadh a bhí sa chailliúnt sin dóibh. Agus bainisteoir nua acu i mbliana, Seán Power, tá na himreoirí ag súil go rachaidh siad céim níos faide ar aghaidh leis. Bhí Power ina bhainisteoir ar fhoireann mhionúir na bhfear a bhuaigh Craobh na hÉireann in 2013 agus d’fhan sé leo go dtí gur bhuaigh siad an chraobh faoi 20 in 2016.
Tá tús ráthúil curtha ag mná na nDéise leis an séasúr seo. Thosaigh siad amach le bua sraithe Roinn 1B i gcoinne Loch Garman. Bhuaigh siad go cuimsitheach le 1-22 in aghaidh 1-06. Fuair Annie Fitzgerald cúig phointe sa chluiche sin, agus í ag imirt le foireann peile Phort Láirge ag an am céanna. Faoin am seo sa bhliain, ní raibh cluiche caillte acu. I gCraobh na hÉireann, bhuaigh siad gach uile chluiche sa ghrúpa chomh maith agus ba é 14 pointe an bhearna ba lú a bhí idir iad féin agus na foirne a thug siad aghaidh orthu. An dtabharfaidh sé sin muinín dóibh ag dul isteach sa chluiche leathcheannais nó an míbhuntáiste é gan aon chluiche crua a imirt go dtí seo?
Mar a tharla le Corcaigh cúpla seachtain ó shin, beidh cinneadh le déanamh idir na bainisteoirí peile agus camógaíochta an tseachtain seo maidir le Fitzgerald. Beidh an cluiche á n-imirt ag na peileadóirí ar an lá céanna leis an gcluiche leathcheannais sa chamógaíocht, gan ach uair a chloig go leith eatarthu. Is léir nach féidir léi an dá chluiche a imirt agus dúirt Pat Sullivan go mbeadh leas Fitzgerald ina ualach ar a intinn.
Bhí Tiobraid Árann ag barr a ngrúpa sa chraobh chomh maith. Bhí bua cinntitheach acu ar Aontroim sa chluiche ceathrú ceannais, 3-23 go 0-06, bearna níos mó ná mar a bhí ag Port Láirge nuair a d’imir siadsan ina gcoinne i mbabhta a trí. As an 5-16 a scóráil Port Láirge sa chluiche sin, a d’imir siad ag tús mhí Iúil, fuair Beth Carton 2-10 acu. Fiú d’imreoir a bhuaigh trí ‘All Stars’, ba thaispeántas den scoth é. Ní raibh sí ach seacht mbliana d’aois nuair a fuair Port Láirge an t-ardú go grád sinsir, agus í mar imreoir lárnach dóibh anois ag fáilt 1-02 cinniúnach sa chluiche ceannais . B’fhéidir gurb í Cáit Devane an chomparáid is fearr léi ar fhoireann Thiobraid Árann. Múinteoir corpoideachais í chomh maith agus imreoir a raibh an fhoireann ag brath go láidir uirthi dos na scóranna le blianta anuas.
An t-aon chluiche a chaill na Déisigh i mbliana ná an cluiche i gcoinne Thiobraid Árann féin. D’imir Port Láirge agus Tiobraid Árann cheana féin i gCraobh na Mumhan, comórtas atá go hiomlán scartha ó chraobh na hÉireann sa chamógaíocht. Chaill siad 4-12 go 1-08 ar an 6u Bealtaine agus lean Tiobraid Árann ar aghaidh chun Craobh na Mumhan a bhuachaint faoi dheireadh, sa ghrád sinsir agus Sosisir. Beidh dúshlán roimh Phort Láirge ar an Satharn go cinnte.
Sa chluiche ceannais eile, beidh buaiteoirí rialta Chraobh na hÉireann Corcaigh ag imirt i gcoinne na Gaillimhe ag 17.30pm. Tá lá iontach camógaíochta amach romhainnn.
