Titim ar na pointí do chúrsa bunmhúinteoireachta trí Ghaeilge, ach ardú do chúrsaí don dara leibhéal

Tá laghdú suntasach tagtha ar líon na bpointí a theastaíonn do chúrsa céime a chuirfidh bunmhúinteoirí ar fáil do scoileanna Gaeilge agus Gaeltachta agus Babhta a hAon de thairiscintí an CAO fógartha an tseachtain seo.

Tá líon na bpointí a theastaíonn chun an Baitsiléir san Oideachas trí Mheán na Gaeilge a dhéanamh in Institiúid Marino i mBaile Átha Cliath tite breis is 70 pointe ó anuraidh, ó 535 in 2021 go dtí 462 i mbliana.

Tá an figiúr beagáinín níos ísle – 459 – do dhaltaí Gaeltachta atá ag iarraidh cur isteach ar an gcúrsa.

Áiteanna breise ar an gcúrsa is cúis leis an titim ar líon na bpointí a theastaíonn i mbliana.

D’fhógair an Roinn Oideachais mí an Mhárta go mbeadh áit do 60 dalta ar an gcúrsa ón bhfómhar seo, ardú ón thart ar 30 áit a bhíodh ann roimhe seo.

Cuireadh tús leis an gcúrsa chun dul i ngleic leis an nganntanas bunmhúinteoirí atá oilte chun teagasc i scoileanna lán-Ghaeilge. Caithfidh na mic léinn grád H3 nó níos airde a fháil i scrúdú ardleibhéil Gaeilge na hArdteiste chun a bheith incháilithe don chúrsa agus caithfidh siad leibhéal B1 a bhaint amachchomh maith i dTeastas Eorpach na Gaeilge sula dtosóidh siad sa choláiste.

Cuireadh tús leis an gcúrsa céime seo ceithre bliana ó shin in 2019 agus tá na chéad céimithe ón gcúrsa tosaithe ag obair i scoileanna ar fud na tíre an tseachtain seo.

“Tagann mic léinn na céime seo ó réimse cúlraí éagsúla, idir Ghaelcholáistí, iar-bhunscoileanna Gaeltachta agus iar-bhunscoileanna ina bhfuil an Ghaeilge mar dhara teanga, ach teastaíonn uathu ar fad tús áite a thabhairt don teanga agus iad ag tabhairt faoina n-oideachas ag an tríú leibhéal,” a dúirt an Dr Claire Dunne, Ceann Roinn na Gaeilge in Institiúid Marino agus comhordaitheoir na céime.

Tháinig ardú ar líon na bpointí a theastaíonn chun cúrsaí bunchéime iar-bhunmhúinteoireachta le Gaeilge a dhéanamh i gColáiste Mhuire gan Smál, i gColáiste na hOllscoile, Corcaigh agus in Ollscoil Chathair Bhaile Átha Cliath.

451 pointe anois atá ag teastáil chun BA san Oideachas, Gaeilge agus Staidéar ar Ghnó a dhéanamh ar champas Choláiste Mhuire gan Smál i nDurlas, suas ó 400 pointe in 2022. 477 pointe (suas ó 467) atá ag teastáil don BA san Oideachas, Gaeilge agus Matamaitic agus 424 pointe (suas ó 419) atá ag teastáil don BA san Oideachas agus Gaeilge agus Staidéar ar Reiligiún.

424 pointe atá ag teastáil freisin ó mhic léinn chun an Baitsiléir san Oideachas agus Gaeilge a dhéanamh i gColáiste na hOllscoile, Corcaigh – suas ó 408 anuraidh – agus 442 pointe a theastaíonn don iar-bhunmhúinteoireacht le Gaeilge agus teanga eile in Ollscoil Chathair Bhaile Átha Cliath, pointe amháin níos mó ná mar a bhí ag teastáil anuraidh.

Beidh cúrsa tríú leibhéal nua, Gnó agus Gaeilge, á thosú an mhí seo chugainn ag Ollscoil Teicneolaíochta an Atlantaigh agus Coláiste Naomh Aingeal i Sligeach. 308 pointe a theastaíonn don chúrsa, a bunaíodh mar fhreagra ar an sprioc atá leagtha amach in Acht na dTeangacha Oifigiúla (Leasú), 2021, go mbeadh 20% d’earcaigh chun na státseirbhíse ina gcainteoirí Gaeilge faoi 2030.

Tá cúrsa ‘Gnó agus Gaeilge’ á reáchtáil freisin in Ollscoil Chathair Bhaile Átha Cliath chomh maith. 387 a theastaíonn chun an cúrsa a dhéanamh i mbliana, suas ó 331 anuraidh.

Fógraíodh Babhta a hAon de thairiscintí an CAO Dé Céadaoin agus na pointí tite i gcás 60% de na cúrsaí tríú leibhéal ar fud na tíre.